體育用品公司一向鍾意贊助國際賽事，除咗參賽隊伍着住自己嘅產品比賽，可收宣傳效果之外，若然贊助嘅球隊或運動員攞埋冠軍，引起嘅連鎖效應好過你揼一千幾百萬賣廣告，所以內地體育用品股近年都好積極贊助外國體育賽事。
有望提高檔次
好似特步（1368）咁，就鍾意贊助唔同地區嘅馬拉松同足球隊，可能成效唔大，華華聽聞特步最近另結新歡，就係內地比較冷門嘅欖球喇。最近佢地成為亞洲橄欖球聯合會（ARFU）官方贊助商，剛剛上月喺旺角場打完嘅亞洲五國賽仲成為官方運動裝備供應商㖭。
其實欖球喺外國幾受歡迎，香港七人欖球賽近年都搞得有聲有色，每年好似嘉年華咁，而且入場人士普遍屬中高檔消費一族，若果打得入呢個市場，產品檔次都可以提升。聽講特步董事長丁水波今年仲特登嚟香港睇七人橄欖球，順道取經。