李寧（2331）早排出咗張澄清公告，話自己呢排無簽到咩中國聯賽，叫市場咪亂估。不過，海迪聽番證券界朋友仔講，聞說李寧真係有傾緊中國職業籃球聯賽（CBA），不過就未成功簽到，仲爭緊櫈仔。CBA一直係國內最多人睇、質素最高嘅籃球賽，姚明和易建聯都係打CBA出身，CBA由04年開始一直由安踏（2020）贊助，合約今年到期。
海迪覺得，李寧係自己攞嚟衰，近年為咗要「升呢」同Nike和Adidas比，主要都係贊助啲名氣較低嘅國際籃球球星，同埋阿根廷、西班牙國家隊，中國聯賽就無搞好耐。
其實N年前咩中國NBA官方合作夥伴、籃球聯賽，全都由李寧贊助咁滯，係李寧自己先放棄呢一塊市場，先俾安踏、匹克（1968）有機可乘，做起咗知名度囉。
李寧今次翻兜國內聯賽，海迪覺得佢係面對現實，想安份做番自己最有優勢嘅中檔市場，而唔係再不停加價扮上菜。
李寧舊年5月，就簽咗個新開辦嘅全國男子籃球聯賽（NBL），但一年以來關注度極低，甚至爆出有球隊呃完裝備就解散嘅鬧劇，其他贊助商一個賽季後已經閃人，只剩番李寧仲贊助緊。海迪希望李寧用好啲體育資源，唔好再掟錢入鹹水海囉！