資深賓架黃遠輝舊年喺工銀亞洲退休之後，生活依然充實。嚟緊嘅暑假，佢會去非洲肯雅，趕上每年8月動物大遷徙嘅季節，觀賞陣容龐大嘅「Big5」（非洲五獸：非洲象、犀牛、水牛、獅子同獵豹）橫跨數千公里嘅非洲大草原。
佢話對呢個場面好期待，成百萬隻動物由東向西走，當中有一成會因為被捕食等原因而完成唔到，都有一定危險性。雖然只係去五到六日，但唔鍾意跟團嘅佢舊年已開始計劃，要提前喺今年3月訂好晒機票同住宿，家仲做緊功課㗎。
肯雅係拍攝非洲熱帶動物同鳥類嘅最佳國度，難怪佢之前見到蘋果嘅攝記，都不停問買乜嘢單反相機好啦，原來係為咗到時影多啲靚相。
黃遠輝去完非洲鬆一鬆之後，9月就即刻開學變身學生哥，入讀中文大學比較歷史碩士課程。佢喺金融界咁資深，但就唔多願意做老師，話全職教書需要投入太多，間中做吓就無所謂喎。