蘋機會：摩記錶Link全身　聽歌收Call

香港人生活緊張，連做運動跑吓步，都總有一堆同事或朋友不停Call你。好彩摩記新出一款運動手錶MOTOACTV，佢不單有齊步速計、GPS等分唇，更巴閉係將手機、藍芽耳機串埋一齊，遇着Message或來電，舉吓隻手就知重要性有幾高，唔怕打擾你運動雅興同節奏。

記者：陳國輝
攝影：潘志恆
Model：Cupid@GME淘女郎

舉舉手便知來者何人

每個人嘅鍛煉習慣各有唔同，或者你穿上背心短褲，一身輕便，就可立即於起步點上出發。但我比較貪心，每次練習粒幾鐘，均特別喜歡配戴手機Armband，一邊播放MP3音樂，一邊慢步跑。驟眼睇，起初以為MOTOACTV只係運動型智能手錶，點知「機肉」可拆出，再裝上同系嘅運動產品，例如專用Armband，穿上手臂輕便之餘，紅黑色設計仲勁襯，睇嚟摩記有心染指Sport界喎。
收集運動數據嘅錶周街都有，而MOTOACTV最突出賣點係「連接中樞」，可Link起Android手機同藍芽耳筒，再將所有SMS、來電顯示喺手錶度，一睇就知乜人搵過你，有需要嘅話，仲可透過藍芽Handsfree即時對話，方便我呢種要一路運動一路聽歌嘅人，完全唔使停步慢慢覆Call咁無癮。

■有專用手機Apps單撈，資料可以跟手錶同步。

■手錶上得幾粒掣，方便運動人士操控。

■靚女Cupid套運動裝襯番MOTOACTV，跑起上嚟又幾型喎。

Android餡Apps助達標

咪以為MOTOACTV必須連接其他配備先可發揮功效，佢除咗係一款電子計時器，仲係內置8GB記憶體嘅Android配件。計我話用嚟聽歌就最掂，皆因1.6吋屏幕只適合顯示簡單操作介面，複雜啲好似上網、睇片就咪搞喇。作為運動裝備，當然唔少得GPS功能，當你啟動跑步程式後，手錶會隨住你所完成嘅路線，規劃出一幅地圖作為參考，並且就距離、地勢高度等數據，幫你分析消耗咗幾多卡路里，等你有明確目標。