深受內地豪客歡迎的天賦海灣，在地產代理界原來被封為「最搵笨」樓盤之一！一名大型地產代理公司的經紀指出，發展商設計蠱惑，在工地掘深半層幾，樓宇建成後就會比實際上矮，製造低密度效果，但就令面對無敵海景的樓房，也出現一堆零景觀的地下單位，「佢（發展商）話係模仿外國設計，增加私隱度，但其實街外啲人可以由高處望落嚟，好似參觀動物園嘅動物咁！」
浴缸細到常人伸唔直腳
該經紀早前更帶記者到示範單位，參觀當時展出的樓盤第一期一系列騎呢設計，包括約40呎的洗手間，「裏面嘅浴缸可算係最細豪宅浴缸，正常人想伸直少少隻腳冲凉都唔得」；部份住宅單位面向電力變壓站，但售樓書同樓盤地圖都無寫明；還有樓盤內一個2,000多呎的I型特色單位，「單位成個啞鈴咁，中間條走廊又長又放唔到嘢，浪費晒啲地方」，但他笑言該單位在同事落足嘴頭下成功賣出。
《蘋果》記者