最近機迷好忙，但忙得幸福，大把遊戲玩唔晒，嚟緊仲有隻集血腥、暴力、性感美女於一身的《LollipopChainsaw》推出，睇住靚女主角Juliet，拿住電鋸當武器，大殺四方，怒斬喪屍，再加上珍藏版超性感比堅尼，激上加激，小心玩到流鼻血喎！
記者：許福合
攝影：林栢鈞
JessicaC.激似主角
《LollipopChainsaw》之所以受機迷關注，不得不提樣靚身材正嘅女主角Juliet，不論美國定日本，宣傳都集中以靚女主打。不過講到最索，一定係香港PlayStation搵嚟嘅JessicaC.，雖然缺少一頭金髮，但面貌同女主角有幾分相像，加上性感Bratop、短裙仔，揸埋道具電鋸，激似！原來佢都係煲機一族：「最鍾意玩《生化危機》類嘅喪屍遊戲，因為夠驚嚇，成日唔夠子彈要慳住用，好刺激。」試玩後，靚女仲話最欣賞係殺敵時嘅血濺畫面，現場感極逼真。計我話作為機迷，見到女主角咁似JessicaC.，玩起來會更投入更有衝勁。
若果你見到Juliet呢套戰衣就收貨，實在太易滿足喇，事關PS3同XB360都會推出珍藏版，各自有至少兩款特典服裝，包括超性感彩帶比堅尼同貝殼比堅尼，靚女主角着住幾套噴血裝，再同喪屍力拼，麻甩仔一定玩到極High。
18禁遊戲
之所以遊戲定位在「18+」級別，除咗經常有鮮血飛濺場面，玩法亦好刺激，如一開始Juliet與男友Nick在上課前約會，但出現喪屍襲擊，Nick為救Juliet被咬而淪為喪屍一員，這時Juliet竟拿起電鋸，大義滅親將Nick個頭割下！更離奇係Nick死唔去，反成為「神奇道具」，幫Juliet應付敵人，實在驚嚇得有點無厘頭。
主要武器係電鋸，不過隨遊戲進度，將出現更多武器及招式，除直接斬擊敵人，有時更要玩家跟Timing按鍵，才可KO喪屍或開啟過關嘅門。遊戲中更引入迷你遊戲，如Juliet被吸入電子世界，純線條場景，好似當年紅白機畫面咁，要將入面的敵人全面擊倒才能過關，都幾過癮㗎。
《LollipopChainsaw》
機種：PS3/XB360
類型：動作冒險
人數：1人
售價：$388
推出：6月14日
