蘋機會：四槳飛船加高清眼　邊滾邊

近年遙控直升機大行其道，受歡迎到連廟街都有得賣。但當你玩過最新嘅AR.Drone2.0，相信會對呢堆國貨無晒興趣；四槳外形已贏成條街，新加720p高清鏡頭，更係全程Live直播起機過程，㩒兩下仲識翻滾玩花式，絕對滿足到你揸飛機嘅夢想！

記者：韓繼聰　
攝影：蔡家輝
Model：Manis@InterplayWorkshop
服裝提供：麥迪奧（23428887）
＊服飾租借三日兩夜$300。

㩒兩下即玩花式

其實AR.Drone早兩年已經嚟過香港，其獨特四槳設計同強勁性能，加上用智能手機控制，早已令唔少人注目。剛到港嘅2.0版，外表雖無大改動，但功能就提升唔少，最正當然係終於加入RealTeim高清鏡頭，架飛船去到邊拍到邊，影像即時Wi-Fi傳落你部智能手機。落手試玩，直播影像非常清晰順暢，高手大可齋望個芒已可周圍飛，感覺就似揸緊真飛機，極過癮！加上小記鍾意拍Movie，用佢嚟拍難得嘅高空飛行鏡頭，再掟上網Share，High到爆啦。
新加360°打圈翻滾功能，只需連按右邊畫面兩次，機身即自動翻身再定咗喺度，相當佻皮。玩熟咗，更可試一邊高速向前、向後甚至轉彎，喺班Friends面前扮吓飛機高手，都咪話唔型！

■㩒兩吓畫面便可翻滾，新手一樣可以變高手。

■機頭設720p高清鏡頭，可直播起機情況，拍片影相效果不俗。

■操作介面簡單，更設有Emergency掣，可隨時急停。

■設有四個獨立螺旋槳，飛行穩定，能做出精細動作。

■機底亦有鏡頭，飛高時TopShot拍片最有型。

AR添玩樂性

除咗高清拍片同翻身兩項過癮新功能，2.0在飛行穩定性上亦有相當提升。AR.Drone2.0內有三軸加速計、三軸陀螺儀、三軸磁力儀、壓力感應器等裝置，令你喺室內外都更易「起機」。佢更提供多項微調功能，加速力量、轉向速度、升降速度、飛行高度等，統統有得調校，夠Pro之餘亦提供更貼心的操控性，國產機仔邊有呢啲嘢玩。佢更支援近期Hit爆的「AR擴增實景」遊戲，小記就試玩咗《ARRescue》，一方面要收集方塊，一方面又要打怪，真實同虛擬結合，十分有趣，但卻需一定操控技巧，絕對有挑戰性。
唯一可惜係叉電一次只玩得12分鐘，不經不覺便玩完，唔想吊癮就要買定後備電。小記都有玩開小型遙控直升機，雖然覺得AR.Drone開價二千幾有啲貴，但玩過之後，佢嘅玩樂性同穩定性都非常吸引，真心一句：好想買呀！