香港人，天性善忘，偏偏有很多日子要記。71、64固然要記；1.29、5.16要記，現在連3.25都要記。一年365日，天天都是歷史分水嶺。09年12月27日，一群茂利「九唔搭八」衝羅湖橋，聲援劉曉波，惹來公安越境執法，記者被捕，示威者卻原來連回鄉證也沒有，「咩人嚟㗎？」電視機旁有人大聲叫。兩年下來，當年不知姓甚名誰的自發網民，已經「進化」為警隊黑名單上的頭號目標，出席公開場合，總有一隊人專職侍候。他們在「集會、遊行、叫口號、返屋企」的方程式上，打開行動的天空，參與社會原來不是大佬專利。FM101核心人物周諾恆，榮升為社運蠱惑仔。
撰文：張嘉雯
攝影：周旭文
野人唔使跟大佬
開創本港衝擊先河、以「我哋無大佬」為核心價值的社運組織FM101，過去兩年來一直是警隊和傳媒目標，組織者怕他們搞亂檔，以「少數衝擊人士」來形容他們。但今時今日，這群「野人」來到中聯辦門前，有時只是圍圈扯煙，仗着浪漫的街燈聊天。
28歲的周諾恆Jaco，父親是職業司機，妹妹做文職，家境除了「平常」之外，找不到其他形容詞。他自言初中時品學兼差又搞事，平時只看課外書──《共產黨宣言》和《國家與革命》，是老師的眼中釘。試過問經濟科老師為甚麼不教馬克思，老師答因為經濟學是一門科學，他駁嘴，「迷信經濟學先至最唔科學！」他討厭那間學校，「成間學校只求向上爬，成績追不上嘅學生，對佢哋嚟講，只係等待報廢嘅貨物，後來轉咗去新界喇沙，啲老師至少當我係一個人。」中七畢業，他到旅行社工作，同儕覺得他是怪人，「嗰時好多女仔，成日講歌星呀、電視劇呀、戲呀，我又唔睇，佢哋食嗰啲嘢我又唔鍾意食。」他說自己超低調，聯誼多數「唔出聲」，內心長期充滿憤恨。
怪胎蛻變成組織
2009年64前夕，他谷到爆，跟一個在高登認識了一、兩天的網友，聯袂在中聯辦外絕食30小時，「家諗返，覺得好Kai！嗰時諗唔到可以做啲乜，又好多浪漫想像，諗住有個無名無姓嘅人出嚟，啲巿民睇到，大家可能會做啲嘢，又或者變到啲嘢出嚟。」當年中聯辦門外，他只是無人理會的儍仔一個，「家會明白，同啲人其實發生唔到關係，呢啲嘢只會變成奇觀。」
同年，他和其他網友衝羅湖橋，聲援劉曉波，有人讚揚他們勇敢，有人批評他們莽撞，「初時諗住玩吓，對自己條底線未諗得好實，大家都係去到先識，點知到了現場淆底。其實我連『零八憲章』劉曉波抱咩立場都未好清晰。」他直認當時無政治立場可言，「淨係識講民主自由，有次喺時代廣場阻食環搶民主女神、瞓馬路、攔警車，因為唔係咁做，都唔知有咩好做。」兩年多來，由最初一群互相不知名字，只會吞雲吐霧的「怪胎」，蛻變為一個有共同理念的組織，「大家都睇多咗書，多咗領會。以前戇居，行動任人詮釋，畀人當正係野人。」
上個月，他們終於完成了一份近萬字的文宣，主力反對資本主義，「我哋唔係講緊lifestyle，唔係講波希米亞，成班中產走去食吓素、做吓瑜伽，就當係個人革命。資本主義賣緊不同嘅貨品，包括生活方式，有晒配套畀你。」做文宣、推理念，技巧是從別人身上學來的，「家喺陶君行辦事處做嘢，貪嗰度福利好，坐監唔會炒魷，又唔介意我上庭。社記（社民連）好多解釋行動理念嘅小冊子，我哋用啲議題類嘅單張，比如民生或勞工等，釘喺面做糖衣，易入口啲；自己想講嘅嘢，就釘喺底。」他覺得這些都是政治責任，「要妥協，有啲嘢自己覺得好啱，但其他人睇唔明，咁不如返屋企打飛機。」101不相信議會政治，有關普選一類議題，不會主動衝擊，「家行動嘅風氣係我哋101同埋社記一齊打出嚟，形象好鮮明，但都要畀其他人開吓波，衝嚟衝去唔係我哋就係社記，其他人就永遠無機會。」
搞社運要講天份
這些年，101與其他團體，如左翼21、八十後反XX分子、獨立媒體等，運動路線不同，百花齊放，「社運有唔同崗位，有人做論述，有人宣傳，有啲做基層組織，負責紀錄，有啲做衝擊，所有位都唔夠人，睇吓個社會需要啲乜，揀一啲自己想做嘅嘢嚟做，我自己好鍾意做action，做做吓開始建立咗自信。」
他自評101發育良好，自己則由「衝動派」變咗「膠水派」，最希望可以把理念擴散開去，「幫手令其他人黐埋一齊，support其他人，組織多啲青年行動者。好似家佔領中環咁，未必爭取到啲乜，但呢個平台可以聚集更多人。」對他本人而言，社運是他存在的意義，「如果無呢條出路（社運），我可能會好似《TaxiDriver》個主角咁，做吓的士司機，又去殺吓人。以前個人好無存在感，做咩都唔叻，讀書又唔叻，運動又唔叻，玩音樂又唔叻，原來社運呢樣嘢，我有天份喎！」
截至五月初，Jaco已經有十一項控罪在身，直言見重案多過見老母，「初初都大壓力，無阿毛（長毛）咁從容，見到Daisy、Leon（中大學生）都要判坐（監），知道自己坐硬，個人反而鬆返晒，我唔係特別鍾意坐監，只不過有樣嘢你好想做，有個目標，自然就會enjoy個過程，入到去，咪當係退修營囉！」Jaco打算放棄的，除了是個人自由，還有下一代，「其實我超級鍾意細路仔，但係有咗都無時間照顧，因為覺得社運好似緊要啲喎，咁多年淨係望住自己個仔，出面死咁多人咁點？唔係無咗我唔得，只係我唔想無咗我嗰份力啫！」
抗議事件簿
06/2009
為平反六四，於中聯辦門外絕食30小時，毛孟靜等人到場支持。
07/2009
於時代廣場發起絕食71小時行動，結束後，他表示，想食碗粥。
03/2011
於政府總部外種植茉莉花，既聲援內地茉莉花革命，又反對預算案。
05/2011
以「仆街」行為藝術，橫陳中環入閘機上，反對港鐵加價。
08/2011
「香港社會關注組」反對外傭永久居港權行動，遭八十後踩場抗議。
01/2012
社記搶咪案，周與長毛等人在庭外抗議，認為判刑過重。
05/2012
涉製造噪音被判無罪，周另外被控阻差辦公則押後裁決。
社運有飯開
Co哥與旅行社妹妹仔格格不入，其中一個主要原因是他口味麻甩，十多歲時已經上「成人」網站36.com的chatroom識朋友，終日跟着一堆三、四十歲的財經人飲飲食食。一談食經，他嘴角即時含春，在社運少女心目中的形象蕩然無存，連101戰友梁穎禮也揶揄他：講到食，佢即時「無晒道德」和階級立場，「話我係食之法西斯喎！我成日唔明，點解唔係《飲食男女》嚟訪問我，成日都係政治版，我可以好似蔡san咁，同啲女一齊，對住鏡頭講：喂，趁熱食喇！」
記者多口問他遊行路線飲食版圖，Co哥說平時好有紀律，由頭行到落尾，攬住籌款箱，絕少偷懶飲茶，不過如果起點在維園，可以去登龍街的泰成菜館，炒嘢、金邊粉、青咖喱豬頸肉或雞翼都是推介；出發前，午膳時間散叫約80元，套餐約40元，叉足電上路至啱。
同差人撐完開路，可以走入灣仔大王東街的新九記粥麵，日頭白白打夜粥邊爐，首推配料鯇魚片；如果終點在中環或者金鐘，而又不留守，一行人會乘電車到駱克道街巿熟食中心，主因是可以坐極多人，主攻小菜，平靚正，「50蚊可以食死你！」
而又如果遊行終點是真正權力核心西環，同時決定不留守，可以吃正斗潮州滷水鵝或生記滷味；而又又如果留守而又又竟然毋須堵路、沒有被捕，可以刁到返中環擺花街Assaf吃黎巴嫩菜，setlunch只是100蚊位；不過如果留守而又被捕並收押於北角警署，Co哥暫時未有保釋或踢保後的心水食點──自由和下一代也可以放棄，食，當然也要放埋一邊喇！
