寶寶唔係食就瞓，每日接觸最多的，是放入口的奶樽，所謂「病從口入」，傳統膠奶樽可能隨時有塑化劑，你都咪話唔驚！要安全到極致，大家不妨放棄膠，用至潮不銹鋼奶樽啦！
記者：陳家蕊
攝影：蔡家輝
Model：Curtis、Katie、Kenneth@PureModels
不銹鋼樽 歐美大熱
傳統我哋對奶樽質地嘅印象，最常見都係膠！現在好多膠奶樽都標榜無公害、無塑化劑，兼受得熱水「洗禮」；但你真係可以完全確定，你所買嘅奶樽真的符合規格？所以大家不妨考慮在歐美近年熱爆的不銹鋼奶樽！
網上嬰兒用品公司Ourbaby，最近就引入PuraKiki不銹鋼奶樽，好處係完全確保無塑化劑問題；加上佢五顏六色嘅不銹鋼樽身，比起傳統透明膠樽真係型格得多，令餵奶都變得時尚感十足！
由於佢係使用美國優質305不銹鋼材，耐用程度高之餘，亦無咁易起氧化物．保證小朋友飲用健康；不過更重要係洗幾多次都好，都唔會咁易有刮花痕迹，可防止細菌滋生。不過要留意的，是不銹鋼奶樽唔可以放入微波爐加熱，及長時間放入熱水中消毒，不過就可以放入洗碗碟機清洗。
防脹氣奶樽 無嘔奶！
飲奶之後，媽咪指定動作係幫寶寶掃風，主要係驚佢嘔奶。其實想防脹氣嘔奶，可以在飲奶過程中「下工夫」！網上討論區好多人推介，Dr.Brown'sPES闊頸樽，佢嘅專利排氣設計，可以防止嬰兒嘔奶、肚風、嗝氣及腸絞痛。
另外一款，軟身的矽膠奶樽Enpeau英寶矽膠奶瓶，完全軟身的瓶身會隨着寶寶飲奶嘅過程中壓縮，減少空氣進入、以達到防脹氣功效。
好多人都驚矽膠遇熱有問題，但實際上佢使用的是醫療級白金矽膠，完全超越市面一般奶樽的安全系數，耐高溫可達450℃；奶樽瓶身觸感柔軟又富彈性，使寶寶拎上手感覺舒適之餘，亦沒有了玻璃奶樽，因容易摔破而引發的危險。
另一款納米銀抗菌矽膠奶樽，還加入了新一代的天然抗菌劑，使其有獨特殺菌效果，可以保持奶類或其他食品的新鮮度，延長保存時間。
玻璃樽身 唔怕熱
除不銹鋼無毒，玻璃材質亦係好多媽媽最愛的無公害奶樽；不過最大缺點係隔熱能力較低，滾水冲奶好易辣親手，一下滑手，隨時仲會「爆樽」！
擁有17年嬰幼兒發展專家經驗PAM，與有三個小朋友的產品設計師Daren就看到了玻璃奶樽的這些問題，聯手創立LifeFactory，設計出鮮艷顏色矽膠套的玻璃奶樽；矽膠套配上玻璃奶樽後，防滑又防摔，攞在手中又唔怕熱，一反玻璃奶樽的傳統！加上佢有不同顏色嘅波點矽膠套，感覺得意又可愛，如果拿走奶嘴位置、配上膠蓋，爸爸媽媽還可當佢係去街水樽，一物多用！
旅行樽 最緊要方便
各款奶樽都用質地取勝，可是有啲媽咪仍堅持使用母乳，只是間唔中先用奶粉！由母乳餵哺專家精心研究的TommeeTippee奶樽，雖然樽身膠膠哋，但整個造型是模仿真實的乳房形狀，即使交替地以母乳及奶樽餵哺，亦可防止寶寶出現混淆的問題。
另一款Playtex旅行奶樽，就勝在夠方便，完全唔使你洗奶樽，有即棄奶袋，直接放入，即取即用、用完即棄、方便到極！我知道有平日好忙的潮媽，就算唔係去旅行，去街時都會用㗎！
大個仔學習杯
媽媽教寶寶由用奶樽到用杯飲水的過程，可能相當艱辛，為了令寶寶習慣棄用奶樽，不妨考慮可以在奶樽上加上手柄；CombiBaby推出因應寶寶不同階段的學習杯，由五個月至兩歲階段，十字奶嘴到吸管喝水的杯形都有，教識寶寶飲水話咁易啦！
a.Ourbaby（35908959）
b.BabyOutlet （ http://www.mamabebe.com.hk）
c.金皓 （26902790）
場地鳴謝：TequilaKola （28773295）