近日同連詩雅以及陸永老婆有舌戰慾照流出嘅rapper曲赤，噚日同許穎（Phoebe）等人喺中環出席活動，曲赤話心情未平復，但覺得未係時候打畀兩位女苦主。講到連詩雅當年愛夜蒲，曲赤話：「以前大家都鍾意蒲，吸引嘅女仔實多男仔追，我都覺得佢吸引先一齊。」問拍拖後連詩雅係咪依然愛蒲？曲赤話：「為過呢啲嘢鬧交，如果一個女仔去蒲而我唔在場，梗唔鍾意。」講到連詩雅日前為慾照流出開記招兼喊晒，曲赤話：「大家都相愛過，見佢唔開心我都唔開心。」
提到被陸永爆已婚，曲赤話：「係，仲有個女。作為人老公同爸爸，我都體諒佢唔開心。」至於陸永話曲赤借慾照宣傳，曲赤話：「我又唔係拍劇，碟又未出，公司因為呢件事hold住出碟。」同曲赤合作新碟嘅Phoebe力撐曲赤好人，仲話有同佢合照，但就冇影伸脷相。同場曾志偉個仔曾國猷話，佢囡囡喺上月母親節出世，志偉幫孫女改名曾詩雨。
柏豪撐師妹
另外，連詩雅原本噚日同師兄周柏豪喺尖沙嘴出席網站團購活動，但最後由莊思敏頂上，講到連詩雅狂仔，柏豪話：「影相啫，佢以前貪玩，但呢幾年已好專心做嘢。」柏豪又話，如果係曲赤放料就好缺德。
