英超球會係就係賺好多錢，但弊在搵得嚟、使得去，所以都係表面風光。就好似前季咁，19間英超球會（伯明翰冇公開盤數）加埋賺咗破紀錄嘅22.71億鎊（274.7億港元、下同）；不過各間球會喺轉會同埋人工開支方面，就使咗286.5億，埋單仲要倒蝕，名副其實係入不敷支。
轉會費人工開支龐大
根據會計師行德勤做嘅調查報告，英超係歐洲最富貴嘅聯賽。2010/11球季嘅資料顯示，英超19間球會嘅總收入升咗12%，達到破紀錄嘅274.7億（賽日收入66.6億、媒體收入142.5億、商業收入65.6億），比另一個有錢聯賽德甲，足足賺多咗84.7億。但係，唔係搵咁多就有咁多落袋，英超球會喺轉會費同球員薪金方面嘅支出，真係多到你唔信，兩樣嘢加埋有成286.5億，條數比之前一季多咗成49.7億。
曼城喺轉會方面使得最多，燒咗17.42億，其次就係車路士同埋曼聯，分別係7.38億同埋4.84億。人工方面，車路士竟然多過曼城，去到23.11億，之後排第2至5位分別係曼城、曼聯、利物浦同埋阿仙奴。
曼城全年勁蝕近24億
使錢咁厲害，兩支藍軍曼城同車路士，亦好順理成章成為蝕錢最多嘅球隊，稅前虧損分別係23.84億同埋9.44億。查實喺19間球會之中，得8間球會錄得稅前盈利，包括賺3.99億嘅紐卡素，第4位嘅阿仙奴都有1.82億落袋，多過曼聯3,700萬港元咁多；而蝕錢嗰11間球會，合共蝕成45.98億，你都咪話唔驚人。
喺啱啱結束嘅球季，曼城同利物浦都用咗勁多錢去簽人，車路士就喺前主帥波亞斯身上，使咗一大筆錢（包括向波圖贖身，以及炒魷嘅賠償）。我求大俠深信，英超球會喺下次公布2011/12球季嘅財政年度，應該仲會蝕得多啲，所以佢哋都係表面風光，如果再唔正視問題，遲早好似歐債危機咁，等住爆煲。