誰人有文化 - 左丁山

誰人有文化 - 左丁山

自從有報紙傳出民政事務局副局長許曉暉會出任新設文化局嘅局長後,好多人唔服,大駡許曉暉冇文化,最搞笑例子就係陳淑莊議員在立法會大大聲講:「羅家英唔識許曉暉!」羅家英識得好多人咩,叫記者問吓羅家英識唔識MichaelSandel?羅家英唔識嘅話,唔通話羅家英冇文化呀?陳淑莊若果唔識分析畢加索名畫,我地敢唔敢話陳淑莊冇文化?自認有文化嘅議員講得出咁冇邏輯嘅說話,香港議會何來文化吖。
某些報紙一窩蜂批評許曉暉無文化,其實最不重視文化嘅就係報紙,報紙報道黃賭毒新聞就叻,報道文化嘅新聞,問心啦,一年唔見得有幾多個全版,譬如最近在會展舉行嘅ARTHK,曾經引起幾多報道呀?寥寥可數,全港只有一張報紙每日有文化專頁!國畫鑑證大師傅申到中文大學新亞書院主持第二十五屆「錢賓四先生學術文化講座」,在三月二十五日、二十八日、三月三十日舉行,幾時見到本港報紙有報道,又有幾多位平時在報紙上開口文化,埋口文化之人有去聽講?
如果話傅申教授係權威專家,講得太深入,去聽都唔知佢講乜,故此報紙唔報道,那麼在會展舉行之ARTHK與商業有關,吸引全球不少畫廊來港參展,係一年一度藝術商業結合嘅盛事,本地報紙又有幾多篇幅去報道呀?左丁山要睇IHT先知道有266家畫廊參展,中國現代藝術作品銷量甚好,例如台北嘅Lin&Lin畫廊在此全數售出十五幅LiuWei之畫作。展覽全部銷售額數以百萬元計,明年ARTHK由馳名世界之ArtBasel接手營運,相信規模會更大,無論邊一位人士出任文化局長,都要重視,或者要呼籲本地傳媒重視。
藝術B與肥仔K等人有去參觀ARTHK,據講現場人山人海擠到水洩不通,估唔到香港市民咁有「文化」!會場內有T恤及載物袋出售,上面印上「MoneyCreatesTaste」一句口號,相信香港啲純文化人會睇到反胃。藝術、文化不與私人金錢(商業)掛鈎,就會孤芳自賞,一味伸大手板向政府乞錢,文化人使錢,納稅人付鈔,佢地仲以為係天經地義㖭!