「大隻謙」羅仲謙近日捲入富家公子劉定成的裸照案，隨住劉公子罪成後，謙仔心情亦大好。前晚他與「關二嫂」黃智雯在銅鑼灣街頭拍劇，雖然被大批圍觀巿民評頭品足，但他一於少理，與黃智雯在鬧市肉緊抱抱。
羅仲謙早前被指講大話，聲稱不認識劉定成，但最終不認不認還需認，劉定成日前被裁定罪成等候判刑，謙仔則繼續開工拍劇。前晚謙仔與曾傳緋聞的「關二嫂」黃智雯，於銅鑼灣鬧市為無綫新劇《巴不得媽媽》拍外景，只見他心情大好，似沒受事件影响。
途人踩唔靚仔
謙仔與黃智雯當街互攬，吸引近百途人圍觀兼用手機狂拍，更有人對謙仔評頭品足，有人讚他高大靚仔，但又有指他唔靚仔及唔係好高，謙仔坦言並不介意︰「梗有人唔鍾意，反而咁多人圍住影，有啲尷尬。」劇情講述二人剛撻着拍拖，情到濃時在大街大巷互攬。
問謙仔可曾介紹另一緋聞女友楊怡給家人認識？他笑說︰「屋企人成日喺電視睇到佢，唔使特別介紹，我同黃智雯係好兄弟，楊怡係好演員、好朋友。」黃智雯被謙仔認定只能做好兄弟，她笑着還擊：「我都當佢係好姊妹，拍攬戲唔尷尬，反而被圍觀就覺得好緊張。」
此外，羅仲謙昨晚出席時代廣場藝術活動，問到有否關注劉公子罪成新聞，他表示：「唔方便講，唔係我擔心，交畀法庭處理，藝人好同唔好新聞都要接受，情緒都會受到影響，不過要專心拍劇。」對於緋聞女友楊怡睇隱世醫師一事，他表示：「如果腰骨有事當然要醫，唔係大家想像中咁大件事。」
採訪：何慧斯、顏英儀
攝影：林德雄