星期三《蘋果》影咗飯焦姐張相，陰功，佢堂堂候任特首辦主任，竟然畀可惡嘅記者捕捉到一副「青雞面」，眼袋仲腫過我哋個荷包，惡死能登。泛民啲人太過百厭，激成佢咁，真係我見猶憐。
飯焦姐咁㷫？原來又係響立法會度硬sell新政府嗰壇「五屍實死局」，佢同老細阿「689」狼英哥好急，指導個個調校吓思想求求其其級個橡皮圖章就算啦，正所謂順我者生逆我者亡，人家死穴係七．一，點知泛民諸多質詢修訂，小心謹慎，飯焦姐兇佢哋「純粹玩嘢」，又搭夠話「畀市民感覺你哋玩嘢」。做埋代言人─我哋小市民，唔覺玩嘢有乜負面，仲好high添。政壇咁苦悶未來咁灰暗，冇理由公帑出糧嘅當權派玩晒，冇權嘅就冇得玩。姣婆遇着脂粉客係玩嘢，你做初一我做十五都係，趁你病攞你命T-Back掉轉着貪你靚想見多幾面通通係，大家咁高興一於玩通宵……害人之心不可有，防人之心不可無，最緊要問心無愧唧，玩嘢咪玩嘢囉。阿爺唔玩嘢，你哋有得上位？心照啦。