海迪先旨聲明，我唔鐘意國美（493）。因為佢企業管治質素低落，每次都要海迪喺管理層嘅講話中，自己「估」同「揀」有意義嘅comment出嚟。不過客觀咁講，國美跌到咁，現價已經去返bookvalue，海迪相信國美係唔會執笠，咁喺投機嘅角度講，值搏率係幾高。
最近國美有單deal，係將「家電業的未來」──即電子商貿業務，賣咗40%股權俾阿媽（黃光裕一家）。呢單嘢表面上係母公司幫手國美一齊搞網購，但實情係，國美焗住要咁做。
事緣黃光裕當年無將國美全部分店上市，一部份由母公司揸住，國美同母公司簽咗互不競爭條款，大家唔可以去對方經營嘅省份做生意。點知發展到今日，家電一定要搞網購先有前途，咁你online買嘢，唔通規定你有幾個區唔買得？仲有唔好忘記，「國美」呢個商標，由始至終都係屬於母公司，只係無條件借俾上市公司用，但條款係「只可以賣電器」。依家內地主要賣電器既網站都會賣書、衫等其他耐用品，如果國美唔賣，仲有咩競爭力？
其實所有嘢，只要黃家一聲話肯俾wavier，咩事都無。但係，黃家只揸國美約30%，你估佢會唔會明益你餘下70%嘅人呢？
海迪