兩性專家「性癲佬」話追女仔時要45度角，又要每隔幾秒就望吓對方，查實使鬼咁複雜咩；好似曼城前鋒巴洛迪利咁，直接示愛咪得囉！話說有一日，腦殘喺條街度，睇中咗個叫羅倫嘅19歲女仔（左圖），於是就做「狗仔隊」跟住人哋返屋企；之後仲夠膽死敲門，單刀直入問對方可唔可以同佢去街。羅倫話當時唔知腦殘係乜水，梗係唔睬佢啦；不過羅倫阿叔史堤夫就認出佢係球星巴洛迪利，就嗱嗱臨請佢入屋坐，兩個仲喺張沙發度講咗成20分鐘波經。羅倫又話，腦殘隨後舊事重提，問可唔可以同佢去街，前後一共問咗3次㖭；但因為羅倫知道對方有女友，加上唔想同足球員發展，所以冇應承到，醒咗隻大檸檬畀腦殘食。就算發展唔成，羅倫都大讚腦殘份人好友善；不過，巴洛迪利就豬咗啲囉，居然同羅倫個阿叔、祖母影相（右圖），家陣證據確鑿背住女友搵食，佢女友拉菲娜肯定搵佢算賬！