賓架P間銀行負責過無數大中型公司上市，佢話工作壓力好大，搞IPO好似Google咁，人人讚好，掌聲滿堂，做上市賓架零舍威風，但若然係Facebook上市，第二日就跌破底價，美國散戶立即乘機控告包銷商及公司要求賠償，咁就手尾長，上市賓架邊度想出嚟見人？至於中國民企上市後爆煲，更是等而下之，負責賓架以後聲名狼藉，好難繼續搵食。
ibanker收入不菲，平時愛好美酒美食，一來食得起，二來視美食為減壓方式，故此在高檔酒家，一定有佢蹤跡，福記、鏞記、陸羽、飯堂、名人坊、大班樓、石屋、潮亭、8?、Robuchon、Caprice等等常見蹤影。飲美酒，食佳餚，可暫時忘卻IPO煩憂。陸海通大廈入伙後，有一間著名紐約意大利菜餐廳Lupa啟業，賓架P想起去紐約做路演之時，去過呢間餐廳，訂位難，門外常有人客排隊等候入內，店內餐飲與服務有好高水平，見到Lupa在港開店，立即前往一試，不試猶可，試過就話以後可以慳番。此日佢在陸羽飲茶，與餐廳R講起，原來餐廳R常做同業研究，Lupa在紐約咁有名氣，梗係第一時間幫襯香港店啦，得到嘅結論與賓架P相同，指餐廳menu菜式有限，侍應服務急待改善，價錢方面咯喎，貴唔貴呢？睇吓你有幾多銀両收入啦。
潮流興意大利菜，其中有啲精巧食品，確實令人回味無窮。公關大姐大去年與朋友到意大利旅行，食到一味白色芝士，樣子似蛋白，係冷凍前菜，吃過一次，佢就日日追吃，返到香港呢，每到意大利餐廳就問有冇，但硬係唔見有。呢日誤打誤撞，左丁山請大姐大成班下屬靚女到Domani，事先請經理代寫菜，不予過問，想唔到頭盤就上呢隻冷凍蛋白芝士，大姐大驚喜莫名，對左丁山講：「乜你知道我鍾意呢隻芝士嘅咩？」知鬼咩，左丁山係冇文化之人，又唔識意大利文，邊知咁多嘢，搵位意大利籍經理一問，佢話呢隻芝士名為Stracciatella，係老闆親自往意大利訂貨，每星期空運到港嘅，來貨不多，要儲存在攝氏2至3度冰格，一星期後就要丟掉。芝士配小番茄，入口清爽，眾人吃下，讚嘆不已，唔怪得大姐大咁鍾意咯！