車路士今屆勇奪歐聯，舉行勝利巡遊之時，班主阿巴莫域治好豪咁講，話要贏多3屆冠軍；但睇吓球隊陣容咁多3字頭，梗係要換血大重組先有希望啦。盛傳今季法甲最佳球員夏薩特，已經決定加盟車仔，波圖嘅「變形俠醫」侯克亦都心動，加上門神施治續約；就算有杜奧巴、沙洛文卡勞等離隊，呢部「新車」馬力都好驚人，想衞冕歐聯，唔係講笑！
效力里爾嘅21歲中場夏薩特，喺歐洲球壇炙手可熱；英國《衛報》報道嘅今夏50大最重要轉會人物，佢就壓過巴甲山度士嘅前鋒尼馬排第一，除咗車仔之外，曼城、曼聯同皇馬都對佢有興趣。呢位比利時國腳，周二就喺其Twitter話：「我將會加盟歐洲冠軍。」雖然冇講明係邊隊，不過有心人都認為夏薩特勢投車仔；英國傳媒隨即報道，夏薩特將以3,200萬鎊轉會費（約3.9億港元）加盟，周薪更高達17萬鎊（約205萬港元）㖭。不過，車仔官方就仲未正式公佈，睇嚟係怕其他球隊臨時搶人啩？
杜奧巴傳投皇馬
車仔嘅重組又點止得夏薩特吖，球會亦剛剛同30歲嘅捷克門將施治，續約至2016年夏天；另外，中鋒人選就指向波圖嘅巴西國腳侯克，連佢經理人都講，侯克對加盟車仔好有興趣。而費托亦都自爆，獲阿巴「拍心口」，來季有得留低；連埋一早簽定嘅雲達不來梅翼鋒馬高馬連，呢架新車嘅馬力認真氣勢驚人。
世界就係咁現實，「只見新人笑、不見舊人哭」，買入咁多人，車仔梗要掃走多餘球員。沙洛文卡勞好大機會轉投史浩克04，轉戰德甲或者係好出路；英足盃同歐聯決賽都有波入嘅杜奧巴已經34歲，但就大把出路。除咗講咗好耐嘅上海恒大，皇馬教練摩連奴對佢都不離不棄，想提供兩年合約簽入呢架「大巴士」；杜奧巴猶如巴塞剋星，如果真係轉投皇馬，巴塞粉絲就真係有得震冇得瞓！