蒙牛（2319）舊年12月已經回歸香港，海迪早幾日陪阿媽去超市買嘢，就罕有見到蒙牛嘅銷售人員喺度擺攤檔，佢好熱情請路過嘅師奶試飲蒙牛，又話有買N送一嘅優惠。只可惜，師奶們一見到係蒙牛，即刻耍手擰頭速閃，情況都幾搞笑。呢件事反映咗一個現實：就係覆水難收，損害咗嘅品牌，要修補並唔係咁容易㗎。
噚日高盛就出咗份報告，話蒙牛自舊年底出現疑似致癌物後，喺內地市佔率由12月的35.8%，跌到4月得32%，加上同業伊利、三元出咗首季銷售表現麻麻，令高盛一嘢勁cut蒙牛盈利預測17%。市場耳語話，蒙牛自出事四個月後，銷售現時的確只恢復到八、九成左右，按年來講，即生意只有些微增長。海迪相信，呢個數字唔少仲係靠宣傳折扣谷出嚟，有理由推測蒙牛嘅利潤率係會有壓力。
海迪覺得，蒙牛短線盈利可能會有影響，長遠嚟講就恃住有阿爺（中糧）撐，點都唔會死。但海迪好同意中糧老總寧高寧嘅講法：唔滿意蒙牛嘅表現！如蒙牛處理食品問題再成日慢三拍，透明度仲咁低，咁只係攞自己嘅品牌生命開玩笑，遲早又被人搞鑊甘囉！
海迪