英國保誠（2378）最於落實主席人選，噚日公佈委任獨立非執行董事PaulManduca做新主席，接替舊年底講咗唔會續任嘅韓偉民（HarveyMcGrath）。Paul本身係怡安（Aon）英國主席，Aon主要提供風險管理、保險經紀、再保險經紀及人力資源諮詢服務，同保誠可算係大半個同行。
CEO有得留低
Aon最多人識，就係英超球隊曼聯波衫嘅心口贊助商，曼聯今年失落英超冠軍，Aon舵手又就走人，咁啱嘅？保誠話Paul將會盡快辭去Aon英國主席一職，等韓偉民今年7月離任，佢就會全情投入保誠工作，每年袍金將會有60萬英鎊。
保誠要換主席，外界一直猜測係為前年收購友邦（1299）失敗而要搵人負責，本來行政總裁譚天忠（TidjaneThiam）係「大熱」，但就有得留低。之不過收購唔成對友邦可能仲好，睇友邦連恒指都入埋，交投又多過保誠，就知市場點睇呢兩隻股啦！