炒期指又關梁振英事?港交所(388)準備推出期貨夜市交易時段計劃,結果同上次延長交易時間一樣,有經紀企出嚟抗議。負責幫香港證券及期貨專業總會向證監講數嘅立法會議員王國興就同華華講,期貨夜市就好似計時炸彈一樣,仲話會喺今晚建制派飯局搵CY幫手拆彈!
怕券商現倒閉潮
工聯會嘅王國興,除咗寫大字,反對期貨夜市都係一條心,上次延長交易時間已經一齊發聲反對,今次佢就話期貨夜市更加嚴重,「上下波幅5%太大,如果真係跌足5%,會引發恐慌性斬倉潮,對券商嘅償付能力造成好大壓力,可能會出現倒閉潮!」
講吓講吓,王議員又話:「家梁振英組唔組到新政府班子都成問題,如果呢個計時炸彈交畀下一屆政府處理會好麻煩。」佢話今晚CY會同建制派晚宴,到時會同佢提出訴求,又會向立法會財經事務委員會提出緊急會議討論事件。究竟期貨夜市搞唔搞得成,CY嘅取向可能好關鍵噃!