政務司司長林瑞麟唔獲CY羅致，下月30號同添馬艦講拜拜，走去英國牛津讀神學。佢大佬、喺港大做咗30年「掌櫃」嘅林炳麟（圖），都係做到下個月合約屆滿退休，回歸紀念日兩兄弟齊齊下崗。
曾有失職之嫌
林家有六兄弟姊妹，林炳麟係老大，林公公係孻仔。林炳麟今年68歲，過咗退休年齡好耐，但三度獲得港大留任，可見佢地位幾重要，呢排啲港大同事輪住幫佢搞歡送會。多年來都傳佢係港大打工皇帝，直至今年初佢先自己踢爆，全校人工最高係醫學院一位教授，捧金飯碗另有其人。
港大醫學院前院長林兆鑫同外科學系前系主任黃健靈，先後分別侵吞公款同造假賬罪成，林炳麟作為財務及企業管理處長，被批評冇睇好盤數，又冇認真調查，有失職之嫌，早排有立法會議員叫港大炒咗佢，但佢最終全身而退，光榮退休，幸甚幸甚。
「新掌櫃」早前公開招聘，最終由財務及企業管理處資深高層Sara盧秀梅擔任。