有150年歷史嘅獅子行滙豐，好多舊嘅行址都可以列入法定文物古蹟，好似最近滙控（005）就決定將位於中東巴林嘅舊址建築物，變身為藝術博物館，配合當地活化工程。
據巴林當地通訊社報道，滙豐巴林行政總裁PatrickGallagher仲專登同巴林文化部長商討活化工程細節，包括確保建築物地標入口要保留，仲要恢復建築物喺1949年當時嘅正面原貌。
滙豐喺1865年先後喺香港、上海同倫敦開業，去過上海外灘嘅朋友，都見過昔日雄踞「東方華爾街」、即係黃浦江邊嘅獅子行總部舊址，銀行大堂氣勢如虹，圓拱頂同大理石地板，件件皆屬巧奪天工嘅藝術品。之不過，亦因為環境同高度限制，好難配合現代辦公室嘅需要，因此滙豐早幾年放棄競投上海呢個舊行址作為中國總部，改以對面江嘅浦東陸家嘴做新總部，舊行址家就由浦東發展銀行使用緊。