噚日沙田馬場舉行「冠軍暨遮打盃」，渣打香港CEO洪丕正（Ben）派錢做善事之餘，又幫馬會執唔少。點解咁講？因為今年阿Ben請埋傳媒朋友睇馬，仲搞搞新意思，特登扲荷包幫在場記者每人買馬，以30蚊買第4場沙田銀瓶三個連贏組合：7號搭8號、7號搭2號、2號搭8號。不過賽前阿Ben呼籲大家如果贏錢，最好捐畀奧比斯防盲計劃「Seeingisbelieving（看得見希望）」。
洪丕正教路：做定功課
結果為善最樂，由次熱門2號同8號跑出，每10蚊派彩82.5蚊，現場特設嘅奧比斯捐款箱即時大豐收。7號都跑第三，如果識得買，連三重彩都有得中。
阿Ben跑完第4場先至現身，貼士咁準，華華同班行家即刻將佢包圍，問佢揀得咁準嘅秘訣。佢就好似賭神咁，即場show咗一張有齊每場賽事預測冧巴嘅貼士紙出嚟，話係好似翠華茶餐廳嘅湯底咁，係秘製㗎。咁神秘，大家影完貼士紙，跟手梗係跟住落注啦。點知除咗第咗第5場，跟住落嚟嗰幾場都冇再貼中頭馬，大部份行家全部做晒善事，幫馬會鋪咗唔少草皮。
細心對番啲賽果，呢張秘製貼士紙原來只得第4場最堅，貼三隻中三隻，即係阿Ben買嗰場最準！但第4場原來有三隻馬棄權，剩番六隻跑，睇牌面揀中機會都高啲啦。阿Ben咁醒只係揀中呢場出錢買，應該就係要教識我哋，投資前要做定功課！
李華華
mailto:[email protected]