吳雨霏（Kary）和林德信（Alex）前晚首度以情侶檔身份在銅鑼灣出席時裝品牌活動，Alex表現怕羞，卻遭Kary踢爆私底下十分健談；Kary否認兩人拍拖，表示一齊出騷亦沒有加酬勞。
一向緋聞多多的吳雨霏，去年底邀同公司的林子祥兒子林德信，擔任其歌曲《我本人》MV男主角，有傳二人因此撻着，除被拍到Kary到Alex家過夜外，早前又結伴睇任賢齊演唱會，令緋聞甚囂塵上。前晚Kary和Alex獲邀出席時裝品牌活動，兩人初時顯得避忌，私下甚少交談及眼神接觸，直至做訪問時才一個咪兩份用，默契十足。
林德信開籠雀扮鵪鶉
Kary強調大家只是朋友，亦否認以情侶價出騷說：「我哋係同事，唔好太敏感，今次酬勞亦同平時差唔多，其實做嘢都冇乜所謂。」一直默不作聲的Alex表現得驚驚青青，被取笑患有陌生人恐懼症時，他尷尬地說：「可能係，我比較怕醜，對陌生人唔慣講太多自己嘢。」身旁的Kary即插嘴踢爆：「佢平時唔係咁，同成班朋友一齊好多嘢講。」
Kary將於下月中舉行音樂會，Alex到時要幫公司另一隊組合做表演嘉賓，故未有機會再合作。問到有否留意Kary的新歌《告白》？Alex說：「我哋經常喺音樂上互相交流，我都有留意佢首新歌，但唔會再做MV男主角，怕悶悶哋，但我都係較鍾意《我本人》呢首歌。」
C君台灣旅行上電視
另外，擔任司儀的農夫成員C君透露早前到台灣旅行時成為當地新聞人物，他說：「原本想去食刨冰，點知間舖無故結業，引嚟好多電視台採訪，我俾人問反應，我咪話好失望囉！」他笑言可籍此進軍台灣市場。
採訪、攝影：王連連