百果園E神DaDa（陳靜）近年頻頻返內地登台搵銀，有消息話DaDa噚日下晝去咗深水埗嘅新樓盤景怡峯睇樓，DaDa承認有意買樓，佢接受電話訪問時話：「因為搵多咗人仔，覺得買樓好過買股票，打算買入370呎單位用嚟投資，因為係樓花，所以只需畀一成首期。」據聞，DaDa睇中嘅370呎中層單位入場費最少要約353萬，睇嚟DaDa都幾有財力。
女助手受傷
其實DaDa搵錢真係有血有淚，佢噚日凌晨十二點幾去咗惠東一間酒吧登台，但係遇上鹹豬手，由於情況混亂，DaDa就同女助手攬住一齊行，點知突然有醉酒客亂掟嘢，助手塊面仲損咗，一時鬆懈嘅DaDa就俾個色狼得手，DaDa之後喺微博公開件事，佢話：「我狠狠賞了他一巴掌，我為我的衝動道歉，但我更為我的手驕傲，希望這一巴掌有好好教育到你，請尊重女性尊重自己！女孩子被色狼欺負不要啞忍，勇敢說出來，避免有下一位受害者。」
DaDa話唔想講俾人摸到邊度，但就話：「當時好激動咪一巴打落去，啲保安唔知乜事就拉咗我走，畀個衰人走甩咗。」DaDa話要畀面個客，最終唔想搞大件事冇報警。