以清熱降火為賣點嘅王老吉，非但唔能夠為廣藥（874）同加多寶降火，雙方為罐凉茶，繼續上火。大半個月前，好多人戥親手湊大紅罐王老吉嘅加多寶唔抵，佢哋睇嚟唔打算輕易放棄，近排頻頻打宣傳戰，喺內地大街大巷同地鐵狂落廣告，口號由「怕上火喝王老吉」變成「正宗凉茶加多寶出品」，睇嚟「紅綠之戰」仲有排打。
官司兩邊燒錢
收番王老吉紅色罐裝同瓶裝嘅生產經營權嘅廣藥集團，發聲明話市場上仍有多種「未經合法授權」嘅相關產品銷售，仲指有企業惡意散佈「紅罐王老吉更名」嘅虛假資訊擾亂市場同侵權。國進民退，市場唔少人質疑廣藥未必能夠發揮王老吉嘅品牌價值，廣藥總經理李楚源答得簡單：事實勝於雄辯。佢哋正通過法律手段同加多寶進行交涉。睇嚟王老吉未重新賺大錢之前，為咗打官司要先嘔一大嚿錢，咁搞落去分分鐘兩敗俱傷！