臉書facebook（fb）上市是今年投資世界的頭等大事，成立短短8年卻已締造了一間市值過千億美元的公司，而IPO集資額度亦是歷來第二，怎說都是市場焦點所在。惟物極總會必反，這一星期的相關新聞都是有憂無喜（除咗東主有喜），此起彼落。「起」的就是空群來的索償官司和面臨監管機構的「起」訴；而「落」的當然就是拾級而下，差點「落」荒的股價。執筆時fb的股價報32美元，破發（跌穿招股價）之餘，若然是上市嗰日擒擒青高追買入嘅散戶，家陣已經唔見咗一截。你話點會唔借啲意就喊賊喊殺，搵人問責？
大摩大蝦細惹官非
而首當其衝的就梗係今次IPO的主要保薦人摩根士丹利（大摩），其分析員早已根據fb提供的資訊，調整該公司的收入預測，但卻選擇性地只向自己的客戶透露，此「親疏有別」的放料方式，業內既知且行之有年，大行大客若不能以大欺小，咁點擔得起個「大」字呀？不過家陣觸動了監管當局，自當別論，又看會否再次驗證「大到不能（被嚇）倒」。至於另一個待罪之身就係納斯達克交易所（納所），納所當日一開始的交易時段，未能即時處理fb的買賣，以至交易要押後進行，萬眾矚目的掛牌儀式卻同時展現了舉世皆見的洋相，貫徹傳奇故事。據說納所亦已作撥備，以應付可能出現的索償訴訟，此之皆因「開壞個頭」。
大摩擺明是恃強犯過，後者只是無心之失，現在都一樣頭痕。查實都不過因為啲新股東借題發揮。若然今日fb股價節節上升，投資者個個賬面都有所斬穫，咁點會有咁多枝節？亦唔會有人在網上廣為fb正名，其中包括「face-bust」「face-broke」等等。惜未見中譯，我姑且稱之為「臉輸」。一，就係啲大行大所護「價」不成，還要惹上官非，確係丟了臉子。二，除了原有股東減持（佔交易量過半）而有實際的經濟得益，真金白銀的賺到錢外，其他嗰啲都仲係紙上富貴，亦有唔少閉翳。
撐起百倍PE難度高
去到年尾應該有相當的員工持股到期可以沽貨套現，再者臉書又不是國企，沒有「大小非」禁，正是貨源充足，往後股價要支持百倍的市盈率（PE），難度更高。幸好還有一批揚言長期持有嘅好友，包括李生。至於剩低嗰啲新捧場客，基本上都係損手，爭在輸多輸少啫。所以家陣如果有人喺臉書開設有關fb上市表現嘅專頁，睇怕dislikes嘅人數應該會創另一新高。
盧先亞