李超人分身家，成為昨日全港各大報章必然頭條。股榮相信，未來一段日子，小小超揀乜玩具，會是市場尋寶話題，但由超人日前口中所講，以及小小超昔日經營模式，我嘗試將範圍收窄，等大家容易啲猜猜。
「有些事，仲（小小超）好鍾意，我會全力幫佢，數字會比佢現有生意資產以數倍計……佢正同幾間具規模的公司接洽」。小小超家經營電訊（電訊盈科）、傳媒（信報、now）及地產（盈大地產）業務，上市王國市值766億元，如超人所言非虛，幾倍資產等如數千億元，絕對與長和系有得揮。
翻查小小超出道至今生意範圍，離不開電訊及地產。股榮相信，超人口中小小超好鍾意的項目，非電訊地產莫屬。90年代衞星電視在香港是一個全新概念，當時所有人認為沒有前途，無法成功，唯獨李澤楷相信搞衞星電視是一個很好的商機，結果短短兩年內衞視覆蓋逾50個國家，家庭用戶幾何級增長，最後賣盤予傳媒大王梅鐸，一盤未賺錢的生意，據聞竟能賺50億元。至於千禧年趕科網熱，以得信佳鯨吞老牌藍籌香港電訊，相信股民更加刻骨銘心。
憑地產項目賺大錢
「（收購目標）唔會係傳媒娛樂，係啲傳統有長遠發展的業務……萬一將來佢做，同長和系相似亦無問題，限佢係唔公平」。長實以地產起家，電訊業務則是和黃核心業務。傳統及具長遠發展業務，離不開地產及電訊等範疇，超人咁講法，仿是預告兩兄弟未來在電訊以至地產，必有一番龍爭虎鬥。
坊間認識的李澤楷，多以為只涉足電訊業，但令其最豐收的投資卻是超人老本行的地產，難怪超人亦指小小超洽購的項目，他亦鍾意。98年李澤楷由政府手中免費取得數碼港獨家開發權，這項以科技包裝地產的項目，最終打造貝沙灣成為南區豪宅，數碼港卻淪為陪襯品。海外方面，小小超97年以58億元購入東京地皮興建盈科中心，06年以130億元轉手出售，創當年日本最高成交價紀錄。
今年《福布斯》富豪榜，超人位列全球第九位。頭10大富豪中，八個白手興家，繼承的只有兩位，且都是知名品牌家族繼承。排首位的，不是微軟創辦人蓋茨或股神畢菲特，而是墨西哥電訊業大亨埃盧，一個操控墨西哥以及拉美地區電訊業的大亨，在去年股市飄搖之際，仍繼續冧莊居冠，這點殊不簡單。
小小超要做第二個電訊業大亨，時機已到。歐債危機令歐洲甚至新興市場部份電訊企業出現資金鏈問題，通街平貨下，和黃未能買下愛爾蘭Eircom，小小超會否執到好嘢？大家拭目以待。
股榮