去年Capcom首度發表《Dragon'sDogma》時，外界都被其壯大世界觀與誇張屠龍劈獸式打鬥所吸引，認定它是針對外國機迷而做的「鬼佬版芒亨」，但玩落又似乎較接近《上古卷軸》或《DragonAge》之類。而爽快動作加上一人組隊系統，難怪不乏外國傳媒都給它高評分。
撰文：佐馬介
爽快劈友我至耍家
基於Capcom近年靠《MonsterHunter》（芒亨）成功取悅港日機迷，廠方固然想連外國都受落，但事與願違，其傾向日式的設定乃最大阻力。所以廠商打造了另一個幻想式冒險世界，以中世紀的戰士與魔法師組隊力戰西洋經典怪物，而最重要是廠方擅長炮製刀劍劈巨獸及格鬥遊戲，所以歐美機迷承認《DD》玩起來爽快度近乎滿分。
故事講主角被紅龍搶去心臟，但竟仍能生存，為取回心臟於是開始冒險之旅。基本上《DD》同其他ARPG一樣，起初只有戰士、疾走者和魔法師三個基本職業，提升至一定能力就可轉職。但一支公探險難度極高，遊戲便設計了Pawn系統讓玩家組隊，帶領三名由電腦控制的隊友作戰，這些戰友大多是其他玩家上載至Server的「化身」，甚有MMORPG感覺。
整靚個樣引人落叠
講到點天花龍鳳都好，將自己個角色整得又靚又正兼揪得至有用，否則玩起來能力不足盞冇癮，樣衰亦難以吸引其他玩家召你入隊，失去賺取寶物機會。雖然許多人都有種迷思，硬係覺得做筋肉人至好打，但其實化身索爆辣妹也不俗，至緊要技能搭夠同執到靚裝。遊戲預設相當數量的角色同Parts，想搵特殊款式如爆炸頭髮亦可從DLC取得。至於兩版本分別，有外國測試發現PS3版的FrameRate相對較不穩定，但Xbox版畫質又稍遜少許，選哪個來玩還是看閣下取捨了。
提醒機友，隨Game附送之《Bio6》試玩版唔可以即時開封！其實光碟內《Bio6》的下載Code，需等到7月3日（Xbox360）及9月5日（PS3）才可使用，請勿搞錯！
《Dragon'sDogma龍族教義》
機種：PS3/Xbox360
類型：ARPG
人數：1人（支援Online）
售價：$328
查詢：CapcomAsia（23661001）
