陶傑在爽報（五月二十二日）寫「文化局長」，左丁山深有同感，候任特首陣營放風，民政事務局局長許曉暉出任新局──文化局局長，即刻引起文化界一批人大駡（只係一批啫，文化界有N批人，陶傑屬於N加一派），曾有現任高官警告左丁山：「不可對新貴名單照單全收，一啲名係用嚟試吓水溫嘅啫，若果有好多人反對，CY會收回，以示從善如流，聽從民意，可以爭取更高民望。」咦，咁講法，許曉暉會唔會係政治試驗品，可以隨時為CY犧牲嘅呢？政治往往是這樣的，文化政治尤其可怕，如陶傑所言，當年魯迅狂批梁實秋，新月派大戰左聯，文化人狗咬狗骨，歷來如此。
某創意書院由著名文化界人士牽頭創辦，創院校長係教育學院教員，對教育行政管理甚有經驗，做一般中學校長勝任有餘，偏偏呢間書院就要求校長不止有行政管理經驗，仲要有「文化」，懂文化藝術，校長做咗冇幾耐，就掛冠而去，讓學校有機會聘請一位既懂文化又懂管理嘅人士做校長。結果如何呢？呢日有資深教育記者（起碼有二十年採訪教育新聞經驗）來電講書價，與佢講起文化局長人選，資深記者衝口而出：「哎吔，咁易搵文化人做局長咩！嗰間書院到家仲未請到校長，三年來校長職位懸空，由副校長署理呀！」咁奇？一校無校長達三年之久，教育局可以視若無睹？怕咗位創辦人乎？
以此類推，文化局長如要（一）文化界中人，（二）懂行政管理，監察公務員，（三）與立法會議員周旋，（四）面面俱圓地向各文化N界撥款、分餅仔，（四）同一晚要諗計如何出席大會堂音樂會、文化中心歌劇、新光戲院粵劇、中央圖書館文藝工作者座談、法國文化部長訪港雞尾酒會，會展ArtHongKong開幕禮……是但一度唔去，都會俾人批評冇文化，唔俾面嘅噃！文化人往往不擅長管理與在官場混飯吃，搵許曉暉做得唔得？其實邊一位仁兄仁姐坐上嗰個位，大家都會問同一問題，有無另一位港大教授龍應台呀？睇吓龍應台在台灣點樣表演，佢一樣俾李敖痛駡啫。