花樣年（1777）老總潘軍經常語出驚人，早兩日喺桂林同香港記者茶敍，佢話近年內地房地產行業已逐漸變成一個加工行業，情況就好似幫Apple做代工嘅富士康一樣，要努力控制成本先至可以維持利潤率，但點解Apple仲可以賺大錢呢？就係佢哋除咗賣iPhone之外，AppStore賺得仲多，因為佢哋只係提供個平台畀軟件開發商，客戶下載apps佢哋就可以分賬。所以花樣年都要開拓自己嘅服務平台，為住戶提供各樣服務，利潤先至可以細水長流喎。
潘總仲豪言，唔跟市場變化嘅企業會被淘汰，20年後將消失，就好似20年前嘅香港，當時有啲比李嘉誠間公司仲要大嘅企業，家都唔知去咗邊。乜20年前仲有人勁過李超人？華華都想知噃。
潘總啱唔啱就真係唔知，但係就肯定有人信，嗰個咪係奧園（3883）前執行董事兼財務總監林錦堂囉，佢上星期二至辭職，原來話咁快就過檔去花樣年幫潘總手。