萬眾期待嘅facebook上市即潛，搞到其他名牌公司唔敢上市？華華絕對唔係靠嚇，唔計曼聯，之前傳過話準備喺新加坡上市嘅Formula1，聽講可能臨門撻cue，據路透社引述新任F1主席包必達喺上星期五嘅股東會後話：「公司仲諗緊喺唔喺新加坡掛牌！」
擔心市況太差
據消息講，其實F1已經喺新加坡通過上市聆訊，仲準備6月開始路演，之不過同時擔任雀巢集團主席嘅F1新主席包必達就向投資者大潑冷水，話董事會上星期先首次正式收到上市計劃書，「而且仲未有開下一次會議嘅時間表」。咁即係冇咁快上市啦！
F1總裁BernieEcclestone之前接受CNN訪問都話，睇住facebook上市股價大跌，都好擔心市況太差，不過佢話啱啱同全部車隊簽約至2020年，F1至少玩多8年，係好有投資價值嘅公司，要上市肯定冇問題咁話。