天后級陳慧琳（Kelly）在事業及私生活上堪稱演藝界模範，跟她合作過的同事或是傳媒都讚不絕口。相反其弟陳司翰演藝事業每況愈下，不時被拍到爛醉、粗魯對女伴及媾女等，與家姐形象相差勁遠。面對細佬的唔生性，身為家姐的Kelly也無奈力撐維護，並指不會囉唆細佬行為。
潮媽陳慧琳（Kelly）昨日靚靚現身銅鑼灣出席家電發佈會，Kelly透露大仔蝦餃仔經已成為一家之主，家中事無大小都要參與，最愛玩吸塵機，及看洗衣機運轉過程，大會特別送上迷你洗衣機滿足蝦餃仔好奇心，而細仔小龍包獲贈BB鞋。Kelly說：「蝦餃仔學小便，之前屋企梳化要包膠袋，又要每隔一個鐘問佢去唔去廁所，好快一個禮拜就教識佢，做媽咪真係辛苦過返工。」
姊弟情受影響
對於胞弟陳司翰被拍到生日醉至不省人事，Kelly淡然說：「其實呢啲唔同佢講，佢咁大個人有分數，生日都係一年慶祝一次。」被指姊弟情受影響，陳司翰連小龍包也沒見過，Kelly維護細佬指有送禮物，當追問有否探過小龍包，Kelly只說：「有一齊食飯。」
冇見過莊思明
面對陳司翰的負面報道不絕及事業無起色，身為家姐的Kelly表示從沒過問細佬的私生活；至於被指背住前女友莊思明媾女等，Kelly說：「佢single識女友好正常，好過成日喺屋企，不過近排報道嘅女仔我全部冇見過，之前嘅就有，我都唔會問佢。」Kelly也希望細佬早日遇到合適的女仔拍拖。
採訪、攝影：馬建華