蒙尼恩、阿祖安盧比斯同柏度洛迪古斯，3個只能活一個！西班牙《馬卡報》報道，國家隊教練迪保斯基諗住帶佢哋其中一個踢歐國盃。阿祖安盧比斯今季幫馬體會贏咗歐霸盃，相信攞咗唔少分數。畢爾包嘅蒙尼恩天份夠高，但略為幼嫩，而巴塞嘅柏度洛迪古斯踢過南非世界盃，經驗豐富，但衰在今季狀態麻麻；相信喺今晚嘅決賽，佢哋兩個都會出盡全力，以博迪保斯基嘅歡心。