賓架W對車仔贏歐聯冠軍，好唔順氣，再睇一次錄影，更加激氣，左丁山買車仔贏，雖然冇錢收（因為以九十分鐘內對賽結果計算），仍然笑騎騎，車路士的確係夠晒運，對巴塞，美斯射十二碼中柱，對拜仁，加時洛賓射十二碼軟弱無力俾施治撲到。點解會好運成咁？問吓足球上帝啦。
但好運之餘，亦要自己努力，拼命，足球賽可以係我地嘅人生反映，懶人坐響度唔郁，蘋果跌落嚟未必會跌落佢嘅頭，車仔後衞互相合作，緊密包抄，前仆後繼咁樣封殺巴塞、拜仁攻勢，一下反擊就有一個殿堂級柱躉中鋒杜奧巴建功，一出手就見血封喉，係厲害㗎。想起2004年希臘亦都係憑呢樣贏到歐洲國家盃冠軍啫。最後還要提及球員嘅榮譽感與專業體育精神，車仔主將如林柏特，杜奧巴，艾殊利高爾，泰利等人都已年過三十，黃金歲月不再，杜奧巴更可能離隊在即，但佢地仍然為個人榮譽而戰，為球會爭光，絕不放軟手腳，我地做打工仔嘅，如果知道老闆已嫌你老，隨時會同你取消聘約，你會唔會繼續咁落力呢？
榮譽與精神係一世嘅，金錢獎賞只屬一時。人生係長途賽，不必為金錢而出賣靈魂。一位印尼先生今年應該有七十幾八十歲咯，佢當年引進中東投資者投資一間上市公司，係錯誤判斷，股價跌到四腳朝天，佢雖然事先冇俾私人擔保，但竟然傾盡個人家財幾千萬美元，以原價將上市公司股票買起，令中東投資者全身而退，左丁山為佢可惜，向佢提出：「你並無任何法律責任咁樣做！」佢對左丁山講：「Myhonourismylife！」
前星期不知何故，飯局中有人提起呢位先生，知道佢仍然在東南亞商界活躍，雖然資金缺乏，不少人仍以佢為師，搵佢做顧問，佢嘅生活繼續寫意逍遙，唔知幾快活。呢類人今天大概已是瀕危品種，難以一見，左丁山在上世紀有幸在中環遇上好幾位上一代富而有禮，牙齒當金使之商界元老，可算幸運，呢類人物大概在商學院MBA課程教唔出，總要浸過吓傳統文化先至有可能。