蘋機會：索記ionMan　鎂鋁裝甲　豪芒加身

索記唔係谷緊新蜘蛛俠咩？搞乜新Xperia同IronMan互乘？非也，只係新機名為ion，咁啱又以金屬裝甲為賣點，純黑鎂鋁合金機身已經夠型，屏幕更首度豪上4.6吋Bravia靚芒，你仲唔失控尖叫？

記者：韓繼聰
攝影：林栢鈞
Model：Christie@
InterplayWorkshop

金屬外殼配4.6吋大芒

呢期Hit爆嘅《復仇者聯盟》，人氣最勁嘅相信都一定係IronMan，一身金屬裝甲，型格與實力兼備。嚟到手機界，金屬外殼原來同樣煞食，Xperiaion以「鎂鋁」合金打造，背面有極幼細的金屬紋，齋睇已經夠Cool。配合機背的微弧設計，手感更係一流，視覺效果與質感兼備！雖然無咗XperiaS嘅招牌透視「腰帶」，但全黑金屬機身，卻更添成熟型格。
另一煞食賣點，就係比S更大的4.6吋超像真屏幕，顏色鮮艷奪目之餘，光亮度亦非常足夠，用嚟睇片睇相真係靚到無嘢好講！加上屏幕由防碎兼防刮玻璃打造，前前後後都同IronMan一樣咁硬淨，就算粗用啲都無有怕！

■4.6吋大芒質素極高，靚女話啱晒佢隨時煲劇睇戲。

■屏幕大4S一個碼，睇片正啲但難單手操作。

■影人影景都有相當水準，顏色自然唔Over，而且非常細緻銳利，絕對有相機質素。

■1.5GHz雙核，配超級靚大芒，睇片非常流暢。

■4.6吋靚芒，細緻度同色彩表現都令人驚艷。

全球首賣　百GB存量任玩

其實Xperiaion早喺大半年前就已曝光，唔少機迷口水長流，估唔到今次新機竟選擇香港作全球首賣，認真威威！預訂更可獲贈32GBmicroSD卡，加埋內置16GB容量，同免費嘅50GB雲端儲存，加加埋埋差不多有成百GB容量。而且1.5秒便可啟動相機，就算你狂影幾多高質靚片靚相都唔使頭痕。
講硬件，Xperiaion排喺XperiaS之後推出，的確無甚驚喜，但全黑魂造型，相比XperiaS走的Young路線，確實又有另一番吸引力。加上貴兩嚿水就可以換個大0.3吋嘅靚芒，計落幾抵玩。可惜係雖支援4GLTE，但制式就唔啱香港用，而且預載嘅亦只係Android2.3.7，要自己手動Upgrade。