陳七潛水！南華足主羅傑承前晚喺部落貼文，決定同近期備受桃色及當街煲煙醜聞纏身嘅前鋒陳肇麒解約，正式逐佢出少林寺；陳七為避風頭，噚日缺席港隊喺九龍仔嘅晨操，不過今日應該會蒲頭，返港隊見班撐佢嘅兄弟。
雖然陳七日前先喺港隊操練後開腔「認矮仔」，希望球迷專注番佢嘅足球事業；點知世事難料，唔夠兩日足主羅傑承就同陳七提前解約，令年僅26歲嘅佢失戀又失業，慘成雙失青年。
可能知道被炒消息會惹嚟傳媒追訪，陳七噚日冇去九龍仔公園球場跟港隊晨操，要由港足主帥摩力克代勞解畫︰「肇麒噚（前）日已知會助教司徒文俊，話有要事與球會商討而未能出席操練。我唔知佢哋傾成點，但佢仍係港隊首席中鋒，佢對中華台北入咗3球，暫未考慮要作替補。」
至於陳七嘅南華兼港隊隊友陳偉豪，都力撐老友仍係香港最優秀嘅華人前鋒，希望佢可以重新投入港隊訓練，備戰下月初對新加坡同越南嘅友賽。
屯門、流浪有意羅致
雖然陳七私生活唔多檢點，不過，始終處當打之齡，只要肯改過應該仲有世界。我求大俠問過部份甲組球會人士，會唔會考慮簽回復自由身嘅陳七，部份話埋好班唔考慮；但計劃下季大搞嘅屯門，教練甄力健就話會同高層研究搵佢幫手。
一手帶陳七上甲組嘅標準流浪總監李輝立話：「其實陳七今次唔係犯咗好嚴重嘅錯誤，只係佢唔知道自己家陣響球圈嘅位置，如果佢冇班落，歡迎佢返嚟搵我，我實幫佢諗掂佢。」照咁睇，陳七嘅足球事業應該唔會咁快玩完嘅。
網民反應
TammyPoon：咁唔爭氣，自甘墮落，咁嘅下場係咎由自取！
StanleyTang：曾經萬眾矚目，家過街老鼠，大好前途咁就冇晒，真係唔自愛。
TamVince：上得山多……