盛女莊思敏追求理想與自由，所以家中八隻小寶貝亦是百分百自由犬，唔使捱痛做絕育手術、唔使學sit同hand，又可隨時大小便，最開心是幾代同堂，唔使骨肉分離，老祖宗的曾孫、混血美男Silver更是她的御用公關，經常陪她四出應酬，不過搞笑是常被認錯是羊。撰文：山葵
莊思敏由懂事開始家中已養狗仔，近30年前，第一隻進駐莊家的老祖宗，是一頭十分可愛的松鼠女，一代接一代，傳宗接代下，家裏養過十幾隻狗仔，十分熱鬧。
挖洞葬松鼠女
莊思敏說：「香港屋企家有八隻，六仔二女，全部都係芝娃娃、松鼠同北京狗，其他仲有西施混松鼠，貴婦混北京，吉隆坡屋企家只得兩隻，全部都係一家人，由上一代生落嚟，除咗第一隻松鼠係買返嚟之外，全部都係佢嘅親生仔女，子子孫孫，兒孫滿堂㗎。」
不過牠們的太嫲和太爺，在莊思敏十一、二歲時已相繼返回天國，她說當時好傷心，與妹妹在屋企後花園挖了個地洞，把牠們埋葬，但現在她卻把狗仔的骨灰，安放在寵物長生殿的靈位，她說：「佢哋生前高床暖枕，死後都要有瓦遮頭，有個安樂窩。」
9歲的Silver就是第一代太嫲松鼠女的曾孫，爸爸是在外邂逅的西施，Silver是莊思敏的社交公關，她經常帶着牠出外應酬朋友，又到中環的時裝店陪妹妹莊思華幫手招呼客人，她攬着毛茸茸、軟綿綿，十幾分鐘都可以不郁動的Silver說：「佢好靜，唔郁又唔吠，所以好肥，同佢出街，路人成日問我佢係乜嘢動物？大家都以為佢係隻羊，因為佢啲毛好厚好鬈。」
全部任生任屙
莊思敏不愛束縛，所以她家中的寶貝亦得到百分百自由，她認為狗仔出生，並非需要工作，亦不一定需要技能，應該在最自然，最沒有壓力下成長。她說：「我哋從來唔會迫狗仔學sit、hand同打斛斗，但會教幾次，如果都學唔識，就由得佢，唔會迫，唔會打，亦唔會罰；我哋會劃定一個地方畀佢哋大小便，幾時想屙，就幾時屙，人都唔可以忍，點解要迫狗仔忍。我全部狗仔都唔使捱痛做絕育手術，冇病冇痛做乜要捱一刀，我哋會盡量將狗仔同狗女分開，無論同邊個生，我哋都會繼續養，就算係外邊識到『男朋友』，我哋都會負責任，養到壽終正寢。」
