由潮人沈嘉偉打骰的I.T（999），3月中開始股價跌不停，海迪聞說管理層早幾個月前已經同證券界吹風，全面調低2012年度的各項預測，所以被人狂沽實屬正常。
據市場講法，I.T呢次截至2月底止嘅全年業績，相信會令大家失望，存貨金額可能會再創新高（即超過10億），存貨周轉天數亦會繼續高企（約半年）。I.T明天正式放榜，海迪等睇呢個講法啱唔啱。
海迪作為I.T嘅顧客，閒時都幫襯唔少，早排不停接到佢地打電話嚟通知我去pre-sale，就明白佢哋貨底有幾重。尤其係上一個冬季，基本上可以用割喉式減價來形容情況慘烈，聽講內地減得仲勁啲添。呢種「要錢唔要貨」嘅態度，令海迪諗起08年金融海嘯，I.T都用過呢招。海迪真係強烈質疑沈嘉偉又再一次睇錯市，去年中以為零售市場形勢大好，所以加重咗入貨同擴張，點知遇到零售市場急放緩，走得太快煞唔切掣，就即刻瀨嘢。
曾經有長期和I.T合作嘅Banker向海迪形容，唔好睇沈嘉偉鍾意揸跑車咁型，其實佢係一個作風好穩健保守嘅人。海迪都相信I.T唔會出事，不過要改善返個業績同現金流，起碼都仲要一段日子。
海迪