近期喺大陸超市互片爭架嘅康師傅（322）同旺旺（151），爭完上架就爭過江龍富豪榜。舊年喺「胡潤中國外來富豪榜」排第一嘅康師傅魏應交家族，今年畀旺旺老細蔡衍明以50億之「微」爬頭，成為2012年嘅胡潤外來首富。
呢個中國外來富豪榜，主要係為進入內地投資嘅境外富豪身家作一番比併。蔡衍明今年可以爬過康師傅頭成為外來首富，除咗因為旺旺銷售做得好之外，同時因為舊年股市插水，偏偏旺旺股價夠晒硬淨，威到做埋恒指成份股。揸住旺旺48%股權嘅蔡衍明，身家當然跑贏其他人啦。至於排第二嘅魏氏家族，舊年一樣威威，旗下康師傅一樣成為香港藍籌，只不過係冇旺旺咁勁咁解啫。
朱鼎健羅康瑞同入榜
睇番呢個外來富豪榜，頭十位都有香港人。好似排第三嘅係觀瀾湖朱鼎健家族、第七嘅瑞安集團主席羅康瑞同埋第九嘅富力地產（2777）董事長李思廉。
不過，入富豪榜未必一定好事，尤其係胡潤。有傳媒統計過，過去十年，胡潤百富榜總共有成50人因經濟問題被調查、判刑或者逃亡，所以被戲稱「殺豬榜」。雖則話今次呢個外來富豪榜只係統計海外富豪，但睇番舊年原本第一位嘅康師傅，叻完之後今年就由淨現金公司變成有三成淨負債比率，個價仲由24蚊樓上跌到落去20蚊樓下，真係唔好唔信邪。
李華華
mailto:[email protected]