80後是最後一代對英治香港有記憶的人，英國個「英」。我請《黑紙》幫我回憶一下回歸15年來的種種，他們劈頭第一句，「有乜咁特別呀？」
對八九民運後出生的90後，所謂英治香港，不比格林童話來得真實，「我淨係聽聞彭定康鍾意食蛋撻。」強調，是聽聞呀！
個多月後，這群生於英治香港的80後90後，將會進入另一個英治香港，梁振英個「英」。對於英國的英治香港，你們擁有的回憶是甚麼？對未來，你們看到的又是甚麼？
記者：劉嘉蕙
攝影：伍慶泉、劉嘉蕙
80後Profile
由三位80後林日曦、陳強、阿Bu組成的創作單位，2010年出版一頁紙雜誌《黑紙》，黑sell黑色信念。2012年《黑紙》宣佈由$1減至$0，5月卻加價，由$0加至$1。
80後：BNO．啟德．老竇買樓
蘋：97年你在做甚麼？
強：我讀中三，生活係踢波睇漫畫、好普通的一個男仔。中三升中四有淘汰制，我突然知驚，發奮讀書，一年內進步了80名。另外一件事對我重要又同香港有關，係老竇買咗樓，我家仲住緊。
Bu：97年最記得係換BNO，無啦啦阿媽話要整，我心諗，整嚟做乜啫，都無去過旅行！但阿媽話唔換就無，咪苦口苦面去申請。當日原本約咗人踢波，因為BNO無得踢，好唔開心。
林：要晨咁早去又多人，細個覺得等一兩個鐘已經好耐。
Bu：嗰時講到BNO好好，好多國家可以免簽證，點知家特區護照仲正。
蘋：我對回歸最大的記憶係好多同學仔移民。
Bu：我都有。我隔籬位女同學叫彭彭，讀書好叻，可惜唔靚。我上堂唔帶文具，就拎佢啲筆嚟用，我無帶書佢又借我睇，好好㗎個女仔。有一日佢話要移民去澳洲，我以為無所謂，到下學期返學，我繼續唔帶文具，寫錯字，想伸隻手去攞塗改液，點知無，跟住我勁喊，嚎哭嗰隻，大叫「彭彭走咗」！之後我卒之去咗買文具。
林：我有個故事好港英，喺啟德機場。細個好低能，鍾意嗰個女仔去旅行，都走去啟德送機，之後填咗我人生第一份歌詞。
Bu：啟德我淨係去過一次，唔係坐飛機，係表哥去讀書，成班姨媽姑姐去送機，焗去，當去參觀機場。啟德機場勁就勁在近市區，但作為80後香港人，未必個個感受過。
強：我就無去過。
凡人總是迷戀過去
蘋 ： 作為青少年，當時點睇回歸？
林 ： 感覺唔大，但見咁多人走，暗地裏覺得留喺香港係死。六四對我來說超恐怖，細個唔會咁夜睇電視，但六四係首次好夜都唔瞓，全家喺度睇電視，第二日又播晒《血染的風采》，好似打到嚟咁。不過作為小朋友，你唔會好強烈去做一啲事，唔通我去搞移民？阿爸無話移民就唔移民㗎啦。
Bu ： 大人覺得好大件事。學校會話，你哋係九七回歸後第一屆會考生；對住上一屆的人又話，你哋係九七前最後一屆會考生，乜都要扣落去。
強 ： 我直情無印象，可能身邊無人移民，睇回歸當睇新聞。淨係有儲皇冠頭一蚊銀，返屋企逐個銀研究，有某啲年份用磁石吸到，有啲唔得。
蘋 ： 記唔記得97年有邊啲風雲人物？
林 ： 碧咸，成隊曼聯；睇完嗰幾年，學黃興桂話齋有今生無來世。米高佐敦；之後睇高比拜仁已覺得唔夠刺激。十幾歲時已覺得，最好嘅已經睇過晒。
Bu ： 流行樂壇係謝霆鋒同Eason。嗰時興DupMD，好多小型CD舖會有呢種服務，CD$100一隻，MD就$15一隻。
蘋 ： 好多人懷緬八九十年代香港，以前有好多叻人。
強 ： 係我哋覺得咋嘛。下一代可能又覺得係2000年最好。
Bu ： 有無睇《情迷午夜巴黎》？咪講緊呢樣嘢囉。呢個年代嘅人迷戀30年前嘅事，30年前嘅人迷戀再30年前，其實並無所謂最好。
林 ： 好似我覺得米高佐敦最好，之後一代覺得係高比拜仁，呢一代係林書豪。
Bu ： 我同阿爸講碧咸施丹，佢都係覺得比利馬勒當拿正啲。所以只係成長那撮人，覺得成長回憶最美麗，其實可能根本不是那回事，只係情意結。
我無得懷念港英
蘋 ： 做創作、電台，會否覺得生不逢時？人人都話以前風光。
Bu ： 可以雙向咁睇，嗰時有四大天王、梅姐，但係無facebook喎，以前上網64k喎。
林 ： 我哋好怕所謂的情意結，淪為一個藉口，等大家放軟手腳。
Bu ： 如果只係活在情意結裏，會變阿叔。日日打開報紙都咁話，80後不知所謂，90後返工遲到。
林 ： 我哋出《黑紙》都俾人話。政治上，我唔明點解有一撮人咁鍾意港英政府，當時都係無自由無民主，又咪一樣。
強 ： 我覺得有部份人唔係真係咁鍾意港英，只係太憎家嘅香港。你問我懷唔懷念港英，我無得懷念，根本完全唔識。
Bu ： 事實上事頭婆同阿爺呢個比喻，已經代表好多嘢。西方文化重視合約精神，所有嘢寫好晒，你返幾多日，有乜嘢權利；但係阿爺就好模糊，「喂我係阿爺喎，你唔係唔幫我吓嘩！」
蘋 ： 好多人擔心香港大陸化，反蝗討論激烈。
林 ： 大陸化不一定是壞事，問題係要揀好的方面來大陸。好似微博，令我哋學識好多有趣嘅大陸用語，文化侵多啲新嘢先會活。
強 ： 溝吓咪幾好，好似飲品咁。蝗蟲事件我哋無出過聲，其實好多討論已經失去理性。
林 ： 舊年訪問吳彥祖，佢都話，中國人最鍾意歧視中國人。北京人就好歧視外省人，佢哋流行一個笑話：北京人同外省人點分？北京人合得埋個口，外省人唔得，因為佢哋去到大城市好驚訝，合唔埋個口。
蘋 ： 有時群情洶湧到一個地步，當你提出冷靜聲音，你都會俾人歧視。
強 ： 可以有討厭，但唔使講粗口話到人隻狗咁，唔鍾意咪唔好理囉，香港人係好易被煽動。
Bu ： 唔知係咪香港人太忙呢，大家唔用時間分析，覺得大眾係咁，我都衝埋去！個個都歧視緊蝗蟲，咁仲使考慮？唔會錯㗎啦！
強 ： 雙非同自駕遊我都反對，但反對，咪叫政府截佢囉，唔使鬧內地人。你話自由行多，佢哋都係申請落嚟玩咋嘛，點知自己係太多啫？
Bu ： 唔關中國人事㗎喎，如果自由行全部變晒日本人，我都覺得要反對。
80後「我的1997」
換BNO護照的記憶最慘烈！青少年要在不用上課的周六早起，莫名其妙排幾個鐘頭隊，換一本唔知為乜的簿。
90後Profile
Chikin
92年出生
港大社科系一年級、《3CMusic》90後樂評人（C）
Pauline
92年出生
港大工商管理（法律）系一年級（PA）
Priscilla
92年出生
港大文學系一年級（PR）
90後：細路哥最驚解放軍
心水清的讀者或者記得月前網上瘋傳過一篇《一名90後對英屬香港嘅感受》，記者拿那篇文章給90後作開場白，三人都茫無頭緒，「佢回歸時得兩歲，點解會有印象？」
PA ： 當年老實講無乜感覺。
PR ： 我記得回歸前一晚，我老竇同我講，你好快啲瞓覺，唔係解放軍落到嚟，捉你走！雖然係講笑，但我真係驚。
蘋 ： 我個年代細路哥最驚係鬼，你哋最驚係解放軍！
C ： 我阿爸係飲港英奶水大，經過麥理浩時期的光輝燦爛，認為回歸是件好感觸的事。但對於我們，那時是幼稚園雞。
蘋 ： 90後對內地印象是偏向負面嗎？
C ： 可能係由細到大的新聞，好似沙士、毒奶、蘇丹紅雞蛋、近期的雙非、自駕遊，一路累積我們的印象。
PR ： 另一個原因，是90後上高登比較多，高登的主流是某一類聲音，都係一種洗腦，會變成極端反共分子。
PA ： 我阿妹10歲，都會開口埋口話強國人點樣，傳媒及高登的威力好大，令呢代人好細個就有負面印象。
蘋 ： 我細個時，返大陸好大件事，去廣州火車站，一行出去就有好多人伸手出嚟問你攞錢。
PA ： 家年輕人返大陸好平常，經常有機會北上交流，放假會上深圳shopping。
C ： 仲有去整牙、打邊爐。我哋呢代，一開始接觸深圳，已經係家咁光鮮，講笑先話小心上到去小心俾人劏腎。
蘋 ： 對英國呢？有無印象？
PA ： 完全無概念。
PR ： 不會崇拜。網上有人話，不如畀番港英政府統治，我最大感受係，香港人點解奴性咁重呢，一定要俾人管？
C ： 我對港英政府嘅印象停留喺彭定康食蛋撻。
PA ： 教科書好少講殖民時代，好少香港歷史，只提一國兩制。
PR ： 有都係得幾十字。
C ： 也不會頌讚港英有何建樹，可能係國民教育成功。
我們不是主場了
蘋 ： 對內地印象負面，對港英無印象。那90後大學生，相信甚麼？
PR ： 我個人不會信賴某個政黨。每個黨後面都有自己的利益勾結，呢個議題邊個好啲就支持邊個。
C ： 我們想得可能較理性，但未必代表所有90後。
PR ： 好多90後都政治冷感，可能係教育影響，老師講乜就信乜，唔會有批判思維。我記得有中學生話支持梁振英嘅原因，係「高大」同「少負面新聞」。
蘋 ： 點睇前景？
C ： 80後無機會上位，更遑論90後。（有無五年目標？）我想已經不會有長遠目標，不是以年份去計，係過得一日得一日。入大學第一年就會有人同你講，呢個field已經飽和、無前途，後來發現個個系都咁講，會計又飽、繙譯又飽。
蘋 ： 大學係咪好多內地同學仔？
PA ： 多！讀商科好多，成個課室前半部都係講普通話。內地生落得嚟讀都係有錢，又係尖子，搏到盡，問問題、交功課最早。本地生會覺得機會俾佢哋搶晒。
蘋 ： 我個年代，其實都只不過係七八年前，內地生好罕有，新年會帶佢哋行花市……
PA ： 家唔會咁。內地生有自己一圈子人，不會特別跟本地生混熟，除非老師分組，先焗住一組。開會用乜嘢語言都好煩。
C ： 我記得有次lecture講廣東話，只得一個內地生，我自動請纓做繙譯，臨尾佢問我：「其實點解係我哋要學廣東話，應該係你哋學普通話迎合。」
蘋 ： 咁好唔同！我個年代，香港人係主場，內地生好禮讓。
PR ： 我哋家唔係主場！又內地生又國際生，去到邊都聽到普通話，第一日返學仲以為返咗大陸！競爭真係好大。
後記：沒有這張蛋撻圖，你還記得他嗎？
利益申報：記者是根正苗紅的80後，如果有人覺得今日的80後要不偏激要不失憶，我簡單為你介紹一下我，以及大部份同代人的人生時間線：生於英治香港，八九民運時在等上小學；要不是學校要默書，我不會學識串末代港督ChristopherPatten的名字；要不是肥彭愛吃蛋撻，我連這個人都記不住。97年香港回歸，沒有上網玩ICQ重要；而50年變與不變，沒有找份筍工重要──假如你最朝氣勃勃的青春期，剛好見證了金融風暴和沙士。
某些大家以為重要的歷史，在時間（或人為的）的冲洗下，在新世代心目中，其實真的沒甚麼，而日子還是照樣過。而香港的未來，不管你喜不喜歡、有沒有信心，終究是要落入這群新世代手中。他們所認識的、所執着的香港，無可避免地，跟你的那一個不會太相同。怎樣？你寧相信瓦奴阿圖，也不願相信這個香港嗎？
