當年有「嘉禾公主」之稱嘅苗可秀,早前接受有線娛樂新聞台節目《星級會客室》訪問,講到佢同已故武打巨星李小龍嘅緋聞,苗可秀話同李小龍合作拍咗三套戲,佢仲話:「小龍真係好錫我。」憶起當年同李小龍喺羅馬拍戲,苗可秀話:「嗰時啲意大利製片人成日色迷迷望住我,我咪同小龍講,之後佢就故意喺食飯時拖我手,又搭住我膊頭,令啲製片人知難而退。」不過,苗可秀強調同李小龍只係好朋友關係,因為大家都冇機會互相了解。