「豬仔」一向喺娛樂圈好吃得開，離開咗公仔箱之後發展更順利，經常搵到老細投資開戲，難怪好多妹妹仔見到佢好似螞蟻見蜜糖黐到實。豬仔自從同「水果妹」拍拖之後都開始修心養性，即使有女投懷送抱都盡量唔上身。最近有傳水果妹為咗套新戲女主角「白白」大呷乾醋，見到人靚啲、姣啲即時睇唔順眼，要求豬仔換角，雖然當事人個個例牌否認。但關仁聽講，水果妹其實有前科，佢因為懷疑一個奀星喺背後唱佢一腳踏兩船，於是要求豬仔棄用佢，搞到個奀星周圍同人講自己係寃枉。雖然唔清楚邊個係神邊個係鬼，但水果妹恃住得寵，經常狐假虎威做幕後黑手，搞到好多人都怕咗佢。
撰文：關仁