今屆歐國盃決賽周仲有唔夠3個禮拜就開波，部份球隊亦開始打熱身賽，其中荷蘭禮拜二作客安聯球場同拜仁慕尼黑打咗場，弱陣下輸2:3。喺歐聯決賽射失12碼搞到拜仁輸畀車仔嘅洛賓（右二），喺76分鐘後備落場，佢一攞波就畀拜仁躉噓，當佢係殺父仇人咁。荷蘭中場雲邦美忍唔住話：「拜仁球迷又唔諗吓洛賓對隊波作出咗幾多貢獻，佢哋咁做好肉酸囉。我係洛賓就唔繼續留隊。」