歐國盃主辦國波蘭（白衫）周二晚喺奧地利中立場同拉脫維亞踢咗場友賽，最終以1:0小勝對手。明顯睇得出，波蘭教練施慕達呢場係試陣，畀啲二線兵落場爭表現，多蒙特嘅羅拔利雲度夫斯基同巴拉斯塞高斯基都冇踢，門將方面亦收起施捷斯尼，用法比安斯基把關。喺81分鐘，波蘭憑漢諾威嘅21歲射手蘇拜治建功贏波。嚟緊波蘭仲約咗斯洛伐克同安道爾拍跳。