「以前菠菜五蚊一斤，家七蚊得半斤；以前十幾蚊一條魚，家就廿幾蚊一條！」彭先生所說的是巿民每日面對通脹實況，只是買青菜魚肉，每餐也貴了十多元，對失業的彭先生來說，可說是百上加斤。
家住橫頭磡20多年的彭先生，早年因工傷失業，自此與中風多病的母親相依為命，靠弟弟辛苦掙來每月5,000元維持生活，原本僅夠餬口，但近年百物騰貴，他們要節衣縮食，把消費減至最低：「我哋一條魚斬開三份，分三日食，菜咪食少半斤，唔飽㗎，但唔係咁點生活呀……」
「叉燒包冇料得汁」
買餸煮飯貴，退而求其次食麪包乾糧，豈料麪包、小食亦偷工減料：「以前啲包係實心，家全部通心，得個殼，點食呀？叉燒包冇料，得汁！」彭生說，每天買幾個麥包及一排方包要25元，有時他索性不煮飯，單靠食包醫肚。
《蘋果》記者