邊款髮型同巴洛迪利最襯？究竟係獅王look、大細哨look、定係華度look呀？全部都唔係，最襯呢個曼城前鋒嘅，始終係佢原本嗰個mohawk頭！
即將代表意大利出戰今屆歐國盃嘅巴洛迪利，雖則個髮型經已係最潮，不過喺一剔嘅新廣告入面，佢仲想繼續試吓唔同造型。個故仔講腦殘喺間舊式飛髮舖一坐低，個師傅就問佢：「你想點剪？」佢直接答：「一定要夠型！」師傅首先幫佢剪個「細哨」朗拿甸奴嘅師奶look，佢即時擰頭表示好唔掂；之後個師傅幫佢試咗英格蘭名將華度嘅鳳尾頭，但係佢都唔滿意，用表情話畀師傅知，呢個頭極之嘔心，仲擰頭叫師傅剪過。
師傅於是幫巴洛迪利剪咗「大哨」朗拿度喺02年世盃決賽周嘅河童look，可惜結果都係一樣，又唔滿意；鬼咩，前面嗰執頭髮搞到佢成個低能仔咁，佢點會鍾意呀！個師傅見佢唔鍾意巴西球星造型，就諗個爆啲嘅髮型，幫佢剪咗個華達拉馬嘅金毛獅王look。呢個髮型夠型夠突出喇啩，點知，佢都係唔like。
最鍾意mohawklook
個師傅都諗無可諗架喇，所以決定博一博；攞個刨出嚟，幫巴洛迪利鏟咗個mohawk頭，仲要係幼條嗰款。腦殘對住塊鏡望兩望兼笑咗兩笑，搞咗咁耐，終於收貨喇。臨離開飛髮舖嘅時候，佢同巴黎聖日耳門後衞馬馬度沙高擦身而過，腦殘回頭見對方個髮型同佢一樣，仲表現得鬼咁自信同得戚㖭！講真，唔知係咪睇慣咗，我求大俠都認為mohawk頭嘅巴洛迪利係最好睇，仲顯得佢幾靚仔㗎！
至於巴洛迪利嘅契爺文仙尼，同樣好注重自己嘅髮型，而呢位意大利主帥就快會同曼城續約3年，年薪仲由350萬鎊加到500萬鎊（約6,133萬港元）；份糧多咗咁多，到時請埋腦殘一齊去剪頭髮都得啦！
