要數當今潮界至Hit耳筒，Monster嘅beats系列一定當之無愧。不過有條線「釣」住，始終型極有限，所以beats終於推出首款無線耳筒，勁玩apt-X籃牙靚聲，以及10小時長氣連播。無條線「吊吊揈」，潮人們戴住呢隻「怪獸」Un都Un得爽啲！
記者：韓繼聰
攝影：楊錦文
Model：[email protected]
apt-X無線靚聲
beats耳筒近年被潮界熱捧，除因外形夠潮，聲音亦有質素，呢款beatsWireless當然繼承呢兩項優良DNA。你可能質疑無線耳筒無咁靚聲，不過佢用嘅係最新apt-X藍牙傳送技術，亦係專門傳送高質音樂嘅無線技術，所以音質比一般藍牙耳筒更好。親自試聽比較，同有線beats的確無甚分別，中高音甜美清晰，低音力量亦相當足夠，加上隔絕外音做得相當好，用家應該滿意。
電量亦係無線耳筒重要一環，beatsWireless能做到「短叉長用」，叉1粒鐘可連播10粒鐘音樂，備用時間更長達100小時，相當長氣。
睇佢有幾潮
高清傾電話
雖以音樂作主打，但作為藍牙耳筒，通話質素亦同樣重要。試驗通話效能，話音相當不俗，雜音少人聲清晰，傾電話絕對可靠。雖然罩耳式耳筒靚聲過入耳式，但唔少人就怕鬼咗佢哋嘅負重，beatsWireless外表雖然頗具霸氣，但出奇地相當輕巧，Model載住不停頭搖又尾擺，起勢跳舞都唔覺頭重同頸攰，加上可摺式設計，無論戴住出街，定放入袋都相當輕鬆。
入耳式精選
高貴玫瑰金
除beats外，Monster仲有Gratitude入耳式耳筒，一睇個樣已知佢矜貴，以玫瑰金色打造，戴上耳高貴十足，女仔特別鍾意。包裝絨盒亦係氣派不凡，入面更另裝有11款不同尺寸的MonsterSuperTips耳塞，總有一款可以完全啱晒你耳仔，保證一粒雜音都入唔耳。Gratitude音色亦屬上乘之作，聲音自然悅耳，若嫌beatsWireless大嚿，Gratitude亦係唔錯選擇。
著名Rapper主理
Ncredible的入耳式耳筒N-ergy，由美國名RapperNickCannon主理，同樣以力量為主打，聽強勁節拍啱晒。價錢較平，屬入門級耳筒。
查詢：大昌行（22621173）