歐洲呢排最大件事,應該係歐債危機同埋多國政府換屆,不過上星期嘅八國集團(G8)峯會就冇乜料到,唔通歐洲真係冇問題?金管局總裁陳德霖(Norman)就諗到一個理由,話啲國家元首仲有多一樣嘢心掛掛,呢樣就係歐聯決賽啦。
唔覺歐洲危機大
Norman噚日去立法會滙報金管局同外滙基金嘅首季表現,忽然間大放笑彈,話上個禮拜六G8開會當日,喺電視見到有幾個歐洲國家領袖睇歐聯決賽,當德國嘅拜仁輸咗畀英國嘅車路士之後,好多元首都走去安慰德國總理默克爾。Norman話睇到呢個情景,都好似唔覺歐洲真係有好大危機咁喎。
聽到呢度,華華都唔記得議員本身問乜嘢問題,好在Norman都冇兜到太遠,識自動波講番歐債前景,Norman用番金句,要小心防範風險!